د نشه يي موادو د قاچاق لپاره د لوګر ولايت نه د يوې مهمې ترانزيټي لارې په توګه استفاده کېږي. د هېواد په ختيځو ولايتونو کې توليد شوي مخدره مواد د لوګر له لارې مرکزي او لويديځو ولايتونو ته قاچاقېږي.
د لوګر امنيه قوماندان وايي، هڅه کوي چې د قاچاق وړونکو پرمخ ټولې لارې وتړي. د ده په وينا په دې وروستيو کې پوليسو يو شمېر قاچاقبران له سلګونه کيلو ګرامه ترياکو او چرسو سره نيولي هم دي.
د لوګر امنيه قوماندان رحم خدا مخلص٬ وويل: ”موږ د مخدره موادو پرضد جدي مبارزه پيل کړې ده، قاچاقبرانو ته اجازه نه ورکوو چې د لوګر له خاورې نشه يي توکي قاچاق کړي. موږ دې ژمنې ته اماده يو.‟
په تازه هڅه کې نږدې اته سوه کيلو ګرامه چرس چې په يوه موټر کې انتقالېدل د لوګر پوليسو نيولي او رسنيو ته یې وښودل. پوليس وايي دا يې د خوښۍ ولسوالۍ په کافَر دره کې نيولي دي.
په خپله په لوګر کې کوکنار نه کرل کيږي خو په ځينو سيمو کې يې د چرسو کرکيله عامه ده. ددې ولايت اوسېدونکي له حکومت نه غوښتنه کوي چې پر قاچاق سربېره د چرسو د کر مخه هم ونيسي.
د لوګر اوسېدونکی ولي جان محزون وايي: ”غوښتنه مو دا ده هغه کسان چې په دې کاروبار کې ښکېل دي، هغوی تعقيب کړي، د کاروبار مخه يې ونيسي او دوی عدلي او قضايي ادارو ته ور معرفي کړي.‟
د مخدره موادو د قاچاق له کبله په دغه ولايت کې د نشه يي موادو خرڅلاو او استعمال ته هم زمينه مساعده شوې ده.
