د ایرلنډ د کرکټ بورډ اعلان کړی دی چې له افغانستان سره د ۲۰ اورونو پنځه نړیوالې پلان شوې لوبې نشي کولی.
د ایرلنډ کرکټ بورډ د دوشنبې په ورځ (دسمبر۱۶) په یوې اعلامیې کې وویل چې دا پرېکړه یې د مالي محدودیتونو او د ۲۰۲۰ نړیوال جام سیالیو لپاره د ځینو نورو لومړیتوبونو په اساس کړې ده.
په اعلامیې کې ویل شوي دي: "موږ د افغانستان کرکټ بورډ ته خبر ورکړی دی چې موږ به ونشو کولی چې په ۲۰۲۰ کال کې د پنځو پلان شویو ۲۰ اوریزو لوبو لپاره د هغوی کوربتوب وکړو. موږ له ډېر وخت راهېسې د افغانانو سیالان یو او بیا به هم یو. خو موږ باید په اوسنی وضعیت کې د یوې مسولې ادارې په توګه د خپلو امکاناتو په اساس فعالیت وکړو."
افغانستان له ایرلنډ سره دا لوبې د ۲۰ اورونو تر نړیوال جام مخکې پلان کړې وې. د ۲۰۲۰ کال نړیوال جام د اکتوبر په میاشت کې پيلیږي، چې د افغانستان په ګډون به په کې ۱۴ لوبډلې لوبیږي.
افغانستان دا مهال په شل اوریزو سیالیو کې په اتم او ایرلنډ ۱۴مقام کې دي.
