افغانستان د دوشنبې په ورځ اپریل ۲۲ (ثور درېیمه) د فوټسال په اسایي لوبو کې بحرین ته ۳-۲ ماتې ورکړه او د دغو سیالیو نړیوال جام ته یې یو بل ګام هم ځان نژدې کړ.
افغانستان په دغه بري سره یو تاریخ جوړ کړ، په دې مانا چې په لومړي ځل د اسیا د فوټسال کپ سیالیو د ناک اوټ پړاو ته یې لاره وکړه.
د افغانستان د فوټبال فدراسیون د افغان لوبغاړو د بري نمانځنې ویدیو خپره کړې ده.
دا لوبه په بنګاک کې وشوه. د افغانستان لپاره د دغه بري ارزښت په دې کې دی چې که افغانستان خپله راتلونکې لوبه (کوارټرفاینل) وګټله، د ۲۰۲۴ کال د فوټسال په نړیوال جام ته به لاره وکړي.
د افغانستان بله لوبه له تاجیکستان سره ده. تاجیکستان په خپل ګروپ کې لومړی مقام لري. په دغه هېوادونو سربېره، ایران او د اسیا نور هېوادونه هم په دغو سیالیو کې برخه لري.
د فوټسال د ۲۰۲۴ کال د نړیوال جام سیالۍ په اوزبیکستان کې کېږي.
فورم \ دبحث خونه