د هند د بهرنیو چارو وزارت پتېلي چې په دوو افغان ستورو راشد خان او محمد نبي یو لنډ مستند فلم جوړ کړي.
دوی دواړه د هند په کورنیو سیالیو ( آی پي ال) کې د سنرایزر حیدر اباد په لوبډلې کې لوبیږي.
په دغه مستند فلم کې به د دواړو لوبغاړو ژوند او لوبې او لاس ته راوړنو ته لنډه کتنه کیږي او دا چې دوی څنګه او له کوم ځای نه پیل او چېرته ورسېدل. په ډیلي کې د افغانستان سفیر شیدا محمد ابدالي امریکا غږ اشنا ته وویل چې دا طرحه منل شوې او د فلم په جوړولو به ژر کار پیل شي.
ښاغلي ابدالي وویل چې د هند د بهرنیو چارو وزارت ټولو هندي او بهرنیو فلم جوړونکو ته دا طرحه اعلان کړې او اوس د فلم جوړونکیو کمپنیو غوښتنلیکونه اخلي. سفیر وویل لا معلومه نه ده چې په دغه فلم به څومره لګښت راشي، خو زیاته یې کړه چې ټوله بودیجه یې د هند حکومت ورکوي.
د دغه فلم اصلي هدف دا دی چې نړیوالو ته د جنګ ځپلي افغانستان یو ښه تصویر وړاندې شي او د افغان کرکټ د لا پرمختګ او ودې لپاره یو مثبت ګام پورته شي.
ښاغلي ابدالي وویل "طرحه داسې ده چې فلم به د ۲ او ۷ دقیقو ترمنځ وي. د هند له حکومت نه مننه کوو چې تل یې له افغانستان سره مرسته کړېده. دا یې پیل دی او د ځینو نورو لوبغاړو لپاره به هم همداسې کوو".
هغه وايي که دا فلم ژر جوړ شو نو د آی پي ال لوبو پر مهال به په تلویزونونو ښودل کیږي، خو که ژر جوړ نشو بیا به د هغه په خبره له آی پي ال وروسته په نړیوالو او افغان تلویزونونو ښودل کیږي.
په فلم کې به د راشد، نبي او افغانستان د کرکټ په اړه د ځینو نړیوالو مبصرینو نظر هم واخیستل شي.
دا لومړی ځل دی چې دوه افغان لوبغاړي په آی پي ال کې لوبیږي. محمد نبي لومړنی افغان و چې دغو سیالیو ته په ۳۰لکه هندي پېسو وپلورل شو خو محمد راشد بیا لومړنی افغان شو چې په آی پی ال کې یې لوبه وکړه.
د هند د سنرایزر حیدراباد لوبډلې راشد خان په ۴۰۰لکه هندي پېسو وپېره، چې همدې کار راشد په کوچني میلیونر هم مشهوره کړ.
