د بهرنیو چارو وزارت په افغانستان کې د سولې ټینګېدو او جګړې ختمېدو په اړه د اروپايي پارلمان د پرېکړه لیک هر کلی وکړ.
اروپايي پارلمان په دې وروستیو کې په افغانستان کې د تاوتریخوالي زیاتوالي په اړه اندېښنه ښودلې او پر ملکي وګړو او افغان سرتېرو باندې د طالبانو د بریدونو بندېدو غوښتنه یې کړې ده.
د افغانستان د بهرنیو چارو وزارت نن شنبه جون ۱۲ (غبرګولې ۲۲) د اروپايي پارلمان پرېکړه لیک ته په هر کلي سره ویلي چې د افغانستان حکومت د افغانانو په مشرۍ د سیاسي هواري له لارې په هیواد کې د تلپاتې سولې ټینګېدو ته ژمن دی.
د اروپايي پارلمان په پرېکړه لیک کې همدارنګه په افغانستان کې د تېرو دوو لسیزو د لاسته راوړنو او ښځو د حقوقو پر خوندیتوب ټینګار شوی دی.
د بهرنیو چارو وزارت زیاته کړې چې افغان حکومت د ښځو د حقوقو په ګډون د تېرو دوو لسیزو د لاسته راوړنو خوندیتوب ته ژمن دی.
د بهرنیوو چارو وزارت له دغه هیواد څخه د نړیوالو سرتېرو تر وتلو وروسته له افغانستان سره د اروپايي شورا د مرستو له دوام هم مننه کړې ده.
له دې سره هم مهاله په افغانستان کې د بشري حقونو خپلواک کمېسیون په دغه هیواد کې د سولې او ثبات ټینګېدو په اړه د افغان او پاکستاني دیني علماو د پرېکړه لیک هر کلی هم کړی دی.
د تیرې پنجشنبې په ورځ د سعودي عربستان په کوربتوب افغان او پاکستاني دیني علماو د یو کنفرانس په ترڅ کې په افغانستان کې د جګړې پر پای ته رسېدو ټینګار وکړ او د سولې له روان بهیر څخه یې ملاتړ اعلان کړ.
د بشري حقونو کمېسیون د مذاکراتو له لارې د جګړې او تاوتریخوالي پای ته رسېدو او سولې ټینګېدو برخه کې یاد پرېکړه لیک مهم بللی دی.
په افغانستان کې د سولې پر ټینګېدو پر داسې مهال ټینګار کیږي چې جګړو یو ځل بیا په دغه هیواد کې زور اخیستی دی.
