ولسمشر محمد اشرف غني وايي، که طالبان جګړې ته دوام ورکوي افغان ځواکونه یې هم باید مقابلې ته لازم چمتووالی ولرئ.
ښاغلي غني تیره شپه مۍ ۱۵ (غوايي ۲۵) د قول اردوګانو قوماندانانو او د زونونو د امنیتي مرکزونو له مسوولینو سره د کوچني اختر مبارکۍ په مناسبت په ټلیفوني خبرو کې ویلي که طالبان اوربند ونکړي د هیواد په هره سیمه کې یې وځپئ.
له ارګ څخه په خپره شوې اعلامیه کې د ولسمشر غني له قوله ویل شوي: "که طالبان اوربند ونه کړي او جګړې ته دوام ورکړي د هیواد په هره سیمه کې به یې وځپي او خپلې وینې تر وروستي څاڅکي له وطن او خلکو دفاع کوي."
نوموړي زیاته کړې:" موږ ټول د نظام او خلکو ساتونکي یوو."
تیره شپه ۱۲ بجې د وسله والو طالبانو او افغان حکومت ترمنځ د کوچني اختر په مناسبت درې ورځینی اوربند پای ته ورسېدی.
افغان حکومت له طالبانو څخه غوښتي چې اوربند وغځوي خو په قطر کې د دغه ډلې د سیاسي دفتر ویاند محمد نعیم تر دې مخکې ویلي وو چې تر اختر وروسته به اوربند ونه غځول شي.
بلخوا فرانس پرېس خبري اژانس د اوربند تر پای ته رسېدو وروسته د ځینو سرچینو له قوله په هلمند ولایت کې د افغان سرتیرو او طالبانو ترمنځ د جګړې خبر ورکړی دی، خو افغان چارواکو او طالبانو لا تر دا مهاله په دې اړه څه نه دي ویلي.
تر دې مخکې د امریکا متحده ایالاتو، یوناما او د افغانستان خلکو د افغان حکومت او طالبانو ترمنځ د اوربند د غځېدو غوښتنه کړې وه.
پر طالبانو فشار راوړئ چې سوله وکړي
ولسمشر غني تیره شپه د بېلابېلو ولایتونو له قومي مشرانو سره لیدنه کې له هغوی غوښتي چې پر طالبانو فشار راوړي چې سوله وکړي.
ښاغلي غني په ارګ کې د کندهار، ننګرهار او لویې پکتیا له قومي مشرانو سره لیدنه کې یو ځل بیا ټینګار کړئ چې د بهرنیو ځواکونو تر وتلو وروسته طالبانو ته د جګړې بهانه نه ده پاتې او په وینا هغوی باید سولې ته لومړیتوب ورکړي.
نوموړي زیاته کړې چې افغان حکومت د سولې اراده او جرئت لري او په وینا یې طالبان هم باید د سولې په اړه خپل نیت روښانه کړي:" د سولې هېڅ پلان او توافق د لویې جرګې له تائید پرته د منلو نه دی."
