د کابل د نابینایانو په مسلکي لیسه کې د "آرمان" په نوم یو کتابتون پرانیستل شو.
دغه کتابتون چې د چهارشنبې په ورځ [اګست ۲] ګټې اخېستنې ته وسپارل شو پکې د نابینایانو لپاره د کیسو او شعرونو سلګونه خاص کتابونه شته. کتابتون کې غږیز او برېښنايي کتابونه هم موندل کیږي.
د نابینایانو د مسلکې لیسې یوه زده کوونکې وایې چې غواړي تر فراغت وروسته معلمه شي او له معلولینو سره د سواد په زده کړه کې مرسته وکړي.
کرشمه چې سترګې یې نه ویني د خپلې کورنۍ په مرسته سبق وایې او په خپل تولګي کې اول نمره ده.
۱۳ کلنه کرشمه د شپږو میاشتو وه چې د یوې ناروغۍ له امله یې سترګې ړندې شوې.
کرشمې له میندو او پلرونو څخه غواړي چې پر خپلو زامنو سبق ووایې: "که هلک وي او که انجلۍ پریږدئ چې درس ووایې."
د کرشمې کورنۍ د خپلې لور راتلونکي ژوند ته خوشحاله ده. مور یې، قدسیه وایې چې د خپلې لور پر تعلیم ویاړي.
قدسیه له خلکو غواړي چې "پر معیوبینو ریشخند نه وهي، احترام دې وکړي او ویې هڅوي".
د افغانستان د پوهنې وزارت د احصائیو له مخې دا مهال په افغانستان کې ۷.۲ میلیونه زده کوونکي صنفونو ته ځي چې نژدې ۴۰٪ انجونې دي.
د افغان چارواکو په وینا د امنیتي، اقتصادي، فرهنګي ستونزو او د ناسمو دودونو له امله ډېری نجونې له زده کړو محرومې دي.