د افغانستان دفاع وزارت وايي، افغان کمانډو په بغلان ولایت کې د طالبانو له زندان څخه اته بندیان ازاد کړي دي.
دفاع وزارت نن دوشنبه مۍ ۲۴ (غبرګولې درېیمه) ویلي چې دغه بندیان تېره شپه د بغلان ولایت د نوي بغلان ولسوالۍ په عمرخېلو سیمه کې د طالبانو له زندان څخه د افغان کمانډو د ځانګړو عملیاتو پرمهال ازاد شوي دي.
د افغانستان د دفاع وزارت د معلوماتو په اساس ټول ازاد شوي بندیان افغان امنیتي سرتېري دي چې د څه وخت راپدېخوا په دغه زندان کې بندیان و.
پر همدې مهال په شمال کې د ۲۱۷ پامیر قول اردو ویاند عبدالهادي نظري امریکا غږ ته وویل چې ازاد شوي بندیان د بلخ مرکز مزارشریف ته انتقال شوي دي.
دا په داسې حال کې ده چې تر دې مخکې افغان ځواکونو د افغانستان په بېلابېلو ولایتونو کې هم د عملیاتو پرمهال لسګونه زندانیان د طالبانو له زندانونو څخه خلاص کړي دي.
د افغانستان د دفاع وزارت په وینا د تېرو څو میاشتو په اوږدو کې د طالبانو شپږ زندانونه د افغان ځواکونو د عملیاتو پرمهال مات شوي او لسګونه زندانیان چې ملکي او پوځي کسان پکې شامل وو خوشي شوي دي.
تر دې مخکې یوناما د طالبانو په زندانونو کې له زندانیانو سره د طالبانو د بد وضعیت په اړه اندېښنه څرګنده کړې وه، خو طالبانو د یوناما راپور رد کړ.
وسله والو طالبانو تر دا مهاله په دې اړه څه نه دي ویلي.
