د افغانستان اجرائیه رئیس عبدالله د امریکا غږ سره په مرکه کې وویل له بده مرغه دا یو واقعیت دی چې د ملي یووالي حکومت د موافقو او ژمنو ځینی موارد ندی پر ځای شوي، هغه پدې مواردو کی یو مثال انتخابات یاد کړل.
ښاغلي عبدالله وویل د انتخاباتو په گډون یو شمیر مهمې ژمنې ندي ترسره شوي. هغه زیاته کړه "... انشا الله په راتلونکي کال کې ټولټاکنې، پارلماني او د ولسوالیو ټاکنی او بل کال ته یې د جمهوري ریاست ټاکنې تر سره شي".
هغه دا هم وویل، د حکومت ډیر وخت په امنتیتي مسایلو تیر شوی دی. هغه وایي طالبانو فکر کاوه چې په ٢٠١٥ کې د بهرنیو ځواکونو له وتلو وروسته به وکړای چې په زور واک ته ورسیږي، خو افغان امنیتي ځواکونو قرباني ورکړه او حالات یې کنترول کړل چې د هغه په وینا "پر ځای ده چې د افغان امنیتي ځواکونو د شهامت او میړانې ستاینه وشي".
ښاغلي عبدالله په هیواد کې لوی بدلون دادی چې خلک اوس د هیواد د سرنوشت د ټاکلو لپاره انتخابات اصلي لار بولي. هغه په شفافو ټاکنو باندې ټینگار وکړ.
اجرائیه رئیس عبدالله دا ومنله چې په حکومت کی د مشرانو ترمنځ ځینی مخالفتونه هم موجود وو.
هغه د بلخ د والي عطامحمد نور سره د سیاسي اختلافونو په هکله وویل چې دا ډول اختلافات د یو نظام د سیاسي ډگر طبیعي برخه ده. خو زیاته یې کړه "دا چې زه به د چا ملاتړ وکړم یا به خپله ځان کاندید د وخت نه مخکې خبرې دي".
د امریکا غږ د پښتو څانگې د مشرې شایسته سعادت لامع سره د ښاغلي عبدالله بشپړه مرکه دلته اوریدای او کتلای شئ:
