ټاکل شوې چې د افغانستان او اسټرالیا کرکټ لوبډلې د یوې ټېسټ سیالۍ د ترسره کولو لپاره د سیالیو ډګر ته ووځي.
د افغانستان کرکټ بورډ د پنجشنبې په ورځ د مې په ۲۸مه (غبرګولي اتمه) په یوې خبرپاڼه کې ویلي چې دغه یوازنۍ ټېسټ لوبه به د روان زېږدیز کال په نومبر کې د اسټرالیا په کوربه توب د دغه هېواد په پرت لوبغالي کې ترسره شي.
په خبرپاڼې کې د یادې لوبې په اړه د بورډ اجراییه رییس لطف الله ستانکزي له قوله راغلي چې دا به افغانستان ته ښه تجربه وي: "اسټرالیه پیاوړې لوبډله ده. زموږ لوبډله به ورته بشپړ چمتووالی ونیسي".
په نړۍ کې د کرونا ویروس له خورېدو او په افغانستان کې د ټولو ورزشي فعالیتونو له ځنډېدو وروسته، دا لومړی ځل دی چې افغان کرکټ بورډ له یوې بهرنۍ لوبډلې سره د لوبې کولو خبر ورکوي.
نړۍ کې هم د کرکټ ټولې نړیوالې لوبې د کروناویروس له کبله ځنډېدلي دي.
که څه هم تر اوسه څرګنده نه ده چې څه وخت به د کرونا ویروس له امله رامنځ ته شوي محدودیتونه پای ومومي خو کرکټ بورډ هیله ښودلې چې تر نوامبر میاشتې پورې به د کویډ-۱۹ ستونزه حل شي.
دا به د کرکټ په نړیوالې شورا کې د یو بشپړ غړیتوب لرونکې لوبډلې سره د افغانستان پنځمه ټیسټ لوبه وي. له دې مخکې افغان لوبډلې له هند، ایرلنډ، بنګله دېش او ویسټ انډیز سره ټیسټ لوبې کړي چې دوه یې ګټلي دي.
