د علي اباد ولسوالۍ یو تن کروندګر نجیب الله چې په شل جریبه ځمکه د انګورو بڼ لري او سږ کال له حاصلاتو څخه خوښ دی وايي، چې پر دغې اوږدې لارې هر کال انګور پلوري، ځکه چې په دغه ځای کې یې خرڅلاو زیات دی. دی وايي کندز بېلابېل انګور لري، چې زیات خواږه دي او پر لارې تېرېدونکي خلک یې خوښوي.
خو دغه کروندګر د انګورو په ساتلو کې له ستونزو سره مخ دی او وايي، چې که د دوی حاصلاتو ته سړې خونې جوړې شي او یا هم بهرنیو هېوادونو ته صادر شي، نو انګور به یې په ښه بیه خرڅ شي.