د بلخ ولایت د چمتال په ولسوالۍ کې د ښوونځي یو شمیر زده کوونکي وايي، چې د ښوونځي د درسونو ترڅنګ د کوکنارو په کروندو کې هم کار کوي ترڅو له دې لارې د کورنۍ لګښت برابر کړي.
سید عمر او محمد عمر چې د ښوونځي شاګردان دي وايي، نیمه ورځ د کوکنارو په کروندو کې بوخت وي او د ورځې دوه سوه یا دوه نیم سوه افغانۍ د کار په مقابل کې ورکول کیږي.
سید عمر او محمد عمر دواړه وايي، چې دوی یوازې نه بلکې د ښوونځي اکثره زده کوونکي د کوکنارو په پټیو کې په کارونو بوخت وي او د درسونو ترڅنګ د کورنیو د نفقې مسؤلیتونه هم ور په غاړې دي.
سید عمر چې د چمتال ولسوالۍ د مرکزي چمتال د ښوونځي د اتم ټولګي زده کوونکی دی وايي: ”نیمه ورځ ښوونځي ته ځم او نیمه ورځ د کوکنارو په کروندو کې خیشاوه کوم، چې د کور لپاره عاید پیدا کړم“.
محمد عمر بیا وايي، چې د کوکنارو په کروندو کې پدې خاظر کار کوي په سیمه کې نور کار نشته دی.
هغه وویل پدې پوهیږي، چې د کوکنارو په کښت کې کار کول به د ډیرو د اعتیاد لامل شي.
محمد عمر وايي: ”هو امکان یې شته چې پدې کوکنارو سړی اخته شي. دا حرام هم دي“.
سږ کال د بلخ په مختلفو سیمو کې د کوکنارو کښت شوی دی. دا کښت د طالبانو د مشر له فرمان مخکې شوی او تراوسه یې د اړولو هیڅ پروګرام نشته دی.