په بلخ ولایت کې د کوکنارو یو شمیر کروندګر وايي، له هغه راهیسې چې د طالبانو مشر د کوکنارو په کر بندیز ولګوه، پدغه ولایت کې د اپينو بیې درې برابره لوړې شوي دي.
د بلخ ولایت د چمتال ولسوالۍ کروندګر وايي چې په دغه ولسوالۍ کې د نورو کلونو په پرتله سږکال ډېر کوکنار کرل شوي او ځکه کوکنار ډېر وکرل شول چې دوی فکر کاوه، واک ته د طالبانو له رسېدو وروسته به پرې بندیزونه نه وي.
خو د طالبانو له خوا د کوکنارو په کر تر بندیز وروسته کروندګر وايي چې د کوکنارو بیې یو په درې اندازه لوړې شوي دي.
د چمتال ولسوالۍ یو کروندګر ولي جان وايي: " دا نوی فرمان چې راغلی، په تاریاکو یې ډېر تاثیر کړی. پخوا چې ۱۰ زره خرڅیده اوس ۳۰زره خرڅیږي".
ولي جان وايي چې د کوکنارو کر د هغه هم نه خوښېږي، ځکه چې ضرر لرونکی بوټی دی. خو وايي چې د کروندګرو اقتصادي وضعیت ښه نه دی او دوی له بل شي دومره ګټه نه شي اخیستلی.
کروندګر ولي جان د طالبانو له حکومت څخه غواړي چې له کروندګرو سره دې د کوکنارو د بدیل معیشت مرسته وشي.
هغه وايي: "د کوکنارو بدیل موږ خپله نه شو پیدا کولای. ځکه چې وس یې نه لرو. د حکومت نه دا غوښتنه لرم چې موږ ته بدیل کښت پیدا کړي او موږ سره مرسته وکړي".
د طالبانو له خوا د کوکنارو په کر بندیز په داسې وخت کې ولګول شو چې کوکنار نېښ ته برابر شوي دي. د چمتال کروندګر وايي، تر لسو ورځو د کوکنار نیښ وهل پيلوي.