د امریکا د متحدو ایالتونو ولسمشر جوبایډن د پنجشنبې په ورځ جنوري ۱۱ (مرغومې۲۱) وویل چې امریکايي او بریتانوي ځواکونو د هغه د لارښوونې په اساس په یمن کې د شیعه حوثي تندلارو په مرکزونو بریدونه کړي.
سپینې ماڼۍ په یوې اعلامیې کې ویلي دي چې دا بریدونه د استرالیا، بحرین، کاناډا او هالنډ په ملاتړ شوي دي. بایډن ویلي چې دا عملیات په سرې بحیرې کې په نړیوالو کښتیو باندې د حوثي تندلارو د وروستیو بریدونو ځواب دی.
سپینه ماڼۍ وايي د حوثيانو بریدونو امریکايي پرسونل، ولسي خلک او د امریکا شریکان له خطر سره مخامخ، سوداګري او د کښتیو ازاد تګ راتګ تهدید کړي وو.
سعودي عربستان په یمن کې د دغو بریدونو په اړه اندېښنه ښودلې ده. د سعودي عربستان د بهرنیو چارو وزارت نن جمعه جنوري ۱۲ (مرغومې۲۲) په یوې اعلامیې د زغم او د شخړې د زیاتېدو د مخنیوي غوښتنه کړې ده.
په اعلامیې کې ویل شوي: «د سعودي عربسان باچا په سرې بحیرې کې پوځي عملیات او د یمن د جمهوریت په ځینو سیمو باندې هوايي بریدونو په ډېرې اندېښنې سره څاري.»
د امریکا د دفاع وزارت وايي چې دغو عملیاتو د حوثي جنګیالیو د رادار سیستم، میزایل او د بې پیلوټه الوتکو ظرفیت په نښه کړي چې د دغې ډلې د بریدونو توان کمزوری کړي.
د امریکا د دفاع وزیر استن وویل: «د ایتلاف نننی اقدام حوثیانو ته ښکاره پیغام ورکوي که خپل غیر قانونی بریدونه بند نه کړي، درنه بیه به پرې کړي.»
On Jan. 11 at 2:30 a.m. (Sanaa time), U.S. Central Command forces, in coordination with the United Kingdom, and support from Australia, Canada, the Netherlands, and Bahrain conducted joint strikes on Houthi targets to degrade their capability to continue their illegal and… pic.twitter.com/bR8biMolSx
— U.S. Central Command (@CENTCOM) January 12, 2024
د متحدو ایالتونو د مرکزي قوماندې مشر جنرال مایک ایریک کوریا ویلي دي چې د حوثیانو «غیر قانوني او خطرناک اعمال به ونه زغمل شي او له هغوی سره به حساب او کتاب» وشي.
د دغې قومندانۍ په اعلامیې کې راغلي دي: «موږ به له حوثي تندلارو او د بې ثباته کوونکو ایراني ملاتړو سره یې د هغوی د غیر قانوني، بې باکه او بې ځایه بریدونه له کبله، چې تر دې دمه یې ۵۵ هېوادونه اغیزمن کړي او د امریکايي ځواکونو په ګډون یې د سلګونو بحري عسکرو ژوند له خطر سره مخامخ کړی، حساب وکړو.»
د امریکا، بریتانیا، جنوبي کوریا، نیوزلنډ، هالنډ، جرمني، ډنمارک، کاناډا، بحرین او استرالیا حکومتونو په یوې ګډې اعلامیې کې ویلي دي چې د خبرداریو سره سره بیا هم حوثي جنګیالیو په سرې بحیرې کې خپل بریدونه ونه درول او د امریکايي او بریتانوي کښتیو په ګډون یې څو کښتۍ په نښه کړې.
په اعلامیې کې ویل شوي دي چې د ملګرو ملتونو د امنیت شورا د جنورۍ په لسمه نېټه د حوثیانو بریدونه غندلي او د درېدو غوښتنه یې کړې وه.
حوثي تندلارو، چې د یمن په ډېرې برخې کنترول لري، په وروستیو اوونیو کې یې په سرې بحیرې کې د باب المندب په تنګي کې د نړیوالو کښتیو تګ راتګ کډوډ کړی و. دوی وايي چې دا بریدونه په غزې باندې د اسرائیل د بریدونه په ځواب کې کوي.
د امریکا د دفاع وزارت وايي چې د اکتوبر له اوومې نېټې د حماس او اسرائیل ترمنځ له جګړې را وروسته حوثي یاغیانو په سرې بحیري او اسرائیل کې په هدفونو باندې د بې پيلوټه الوتکو او میزایلو ۱۰۰ بریدونه کړي دي. د دغو بریدونو له کبله څه باندې ۲۰۰۰ کښتیو خپلې لارې بدلې کړې او او زرګونه کیلو میتر اضافه مزل یې کړی چې خوندي وي.
حوثي جنګیالي وايي چې د اسرائیل کښتۍ او اسرائیل په نښه کوي او تر څو پورې چې په غزې کې یې عملیات روان وي، دوی به هغه کښتۍ هم په نښه کوي چې د اسرائیل په لوري روانې وې.