د افغانستان د ملي امنیت شورا وايي، د روژې میاشتې په دوهمه اونۍ کې د طالبانو لخوا د ملکي وګړو تلفاتو کې۳۳ سلنه زیاتوالی راغلی دی.
امنیت شورا ویلي چې د روژې میاشتې په دوهمه اونۍ د وسله والو طالبانو په بریدونو کې ۲۵ ملکي وګړي وژل شوي او ۷۴ نور ټپیان شوي دي.
د یادې شورا ویاند جاوید فیصل پرون شنبه مې۹(غويي۲۰) ویلي چې ملکي وګړو ته د طالبانو لخوا دغه مرګ ژوبله د افغانستان په ۱۸ ولایتونو کې په مخامخ ډزو او د سړک غاړې ماین چاودنو کې اوښتې ده.
امنیت شورا تر دې مخکې ویلي و چې د روژې میاشتې په لومړۍ اونۍ کې په ۱۷ ولایتونو کې د طالبانو په بریدونو کې ۱۷ ملکي وګړي وژل شوي او ۴۹ نور ټپیان شوي و.
وسله والو طالبانو تر دې مخکې د افغان چارواکو ورته څرګندونې رد کړي دي.
دا په داسې حال کې ده چې د افغانستان د ملي امنیت شورا تیره ورځ یو ځل بیا پر طالبانو غږ وکړ چې د تاوتریخوالي په کمولو سره سولې ته خپله ژمنتیا ثابته کړه.
دغه شورا همدارنګه ویلي و چې د طالبانو لخوا د تاوتریخوالي دوام د سولې له بهیر سره مرسته نه کوي: "د طالبانو لخوا په اوسني شکل د تاوتریخوالي دوام، د سولې له پروسې سره هیڅ ډول مرسته نه کوي، بلکې دا خطر تر پخوا هم غښتلی کوي، چې ښايي د دوی لخوا ناروا تاوتریخوالی د یادې پروسې د سبوتاژ سبب شي."
د افغانستان ولسمشرۍ ماڼۍ هم تر دې مخکې ویلي و چې د طالبانو لخوا د بریدونو زیاتوالي خلک د سولې پر بهیر بې باوره کړي دي.
دا په داسې حال کې د روژې میاشتې په مناسبت ملګرو ملتونو، د اسلامي همکاریو سازمان او ناټو او ګڼو نورو بنسټونو په افغانستان کې د ښکېلو غاړو ترمنځ د اوربند ټینګېدو غوښتنه کړې ده.
د یوناما د راپور له مخې د روان ۲۰۲۰ کال په لومړیو دری میاشتو کې په افغانستان کې د ښکېلو اړخونو ترمنځ نښتو کې ۵۳۳ ملکي وګړي وژل شوي دي.