روسیې د دوشنبې په ورځ جنوري ۲۹ (سلواغې ۹) په رسمي توګه د ولادیمیر پوتین نوم د مارچ میاشتې د ولسمشرۍ ټاکنو لپاره د کاندید په توګه ثبت کړ او اټکل کیږي چې پوتین به دغه ټاکنې وګټي.
۷۱ کلن پوتین د دې پیړۍ له پیل راهیسې پر روسیې واکمن دی، او په داسې یو سیاسي سیستم کې یې څلور دورې ولسمشري ګټلې او د لنډ مهال دپاره صدراعظم پاتې شوی، چې اپوزیسیون په حقیقت کې شتون نلري.
د روسیې د ټاکنو مرکزي کمیسیون وویل چې د پوتین ترڅنګ یې د هغه ښي اړخی وفادار لیونید سلوتسکي د کاندیدانو په توګه ثبت کړی دی.
ټاکنې د مارچ له ۱۵ څخه تر ۱۷ پورې په دریو ورځو کې ترسره کیږي. د کرملین منتقدین استدلال کوي چې دا کار په ټاکنو کې د شفافیت تضمین کول خورا ستونزمن کوي.
په ۲۰۲۰ کې په اساسي قانون کې له جنجالي اصلاحاتو وروسته، پوتین کولی شي لږترلږه تر ۲۰۳۶ کال پورې په واک کې پاتې شي.
د بشري حقونو ډلې وايي، په تېرو ټاکنو کې بې نظمۍ شوې او ښايي په راتلونکو ټاکنو کې خپلواک څارونکي د رایو له څارنې منع شي.
په داسې حال کې چې تمه نه کیږي چې پوتین به په راتلونکو ټاکنو کې له کومې ریښتینې سیالۍ سره مخ شي، د هغه لیبرال سیال بوریس نادزدین د کاندید په توګه د نوم لیکنې لپاره د اړتیا وړ لاسلیکونه راټول کړي دي.
خو لا روښانه نده چې ایا هغه ته به اجازه ورکړل شي چې ټاکنو ته ودریږي، او کرملین ویلي چې نادزدین د جدي سیال په توګه نه ګڼي.