د کندهار امنیتي چارواکي وايي، ددې ولایت په پنجوايي او میوند ولسوالیو کې د سړک غاړې ماین چاودنو له امله ۷ ملکي وګړي وژل شوي او درې نور ټپیان شوي دي.
د کندهار د پولیسو ویاند جمال بارکزي نن پنجشنبه مۍ ۱۳ (غوايي ۲۳) امریکا غږ ته وویل چې لومړۍ چاودنه د پنجوايي ولسوالۍ په صالحانو کې پر یوه ټکسي موټر شوې چې له امله یې دوه ماشومان وژل شوي او د موټر چلوونکي په ګډون دوه تنه نور ټپیان شوي دي.
هغه وویل چې دغه راز د میوند ولسوالۍ په مرکزي برخه کې هم نن لس نیمي بجې د سړک د غاړي ماین چاودنې له امله پنځه ملکي وګړي وژل شوي دي.
د پوليسو مقامات وايي چې په دواړه پېښو کې قربانیان د اختر لمانځنې لپاره د خپلو خپلوانو لیدو ته روان وو چې له یادو پېښو سره مخ شوي.
تر دا مهاله د دغه ماین چاودنو مسؤلیت کومې وسله والې ډلې نه دی منلی.
دا په داسې حال کې ده چې سر له نن څخه بیا د کوچني اختر دریمې ورځې پوري په افغانستان کې اوربند اعلان شوی دی.
د افغانستان د بشري حقونو خپلواک کمېسیون د معلوماتو په اساس د تیرې روژې میاشتې په ۲۳ ورځو کې ۱۶۰ ملکیان وژل شوي او ۳۵۱ نور ټپیان شوي دي.