مسکو خبرداری ورکړی که لویدیځ کیف ته لېرې واټن وېشتونکي توغندي، چې روسیه پرې وېشتل کېدای شي، ورکړي، جګړه به نوره هم شدیده شي.
د روسیې د جمهوري ریاست ویاند دمتري پسکوف نن پنجشنبه جنوري ۱۹ (مرغومې۲۹) خبریالانو ته وویل: «په بالقوه توګه، دا به بیخي زیات خطرناک وي، په دې مانا چې، جګړه به بیخي یوې نوې مرحلې ته داخله کړي چې د نړۍ او پان-اروپا د امنیت له نظره به ښه نه وي.»
مسکو داسې مهال دا خبرداری ورکوي چې لویدیځ هېوادونه غواړي اوکراین ته نورې قوې وسلي ورکړې او کلیدي مرسته کوونکي د یوې بلې غونډې په درشل کې دي.
ټاکل شوې چې متحده ایالتونه به د جمعې په ورځ په جرمني کې د «رامستین هوايي اډې» کې له خپلو ایتلافیانو سره د خبرو په یوې بلې مرحلې کې د اوکراین د پوځ په ملاتړ وغږېږي.
تر دې مخکې د امریکا په متحدو ایالتونو کې د روسیې سفیر اناتولي انتونوف ویلي که اوکراین په روسیې او د کریمیه په جلا کړل شوې ټاپو وزمې باندې د لویدیځ له لوري ورکړل شوې وسلې وکارولې، مسکو به یې غچ واخلي.
د روسیې مخکني ولسمشر دمتري مدویدوف هم خبرداری ورکړی چې د لویدیځ له لوري اوکراین ته د وسلو ورکول د «اتومي جګړې» لامل کېدای شي.
روسیې تېرکال په اوکراین یرغل پیل کړ، امریکا او متحدینو یې دا برید وغنده او له اوکراین سره بشري او پوځي مرسته کوي چې د روسیې په ضد دا جګړه وګټي.