د یمن ایران پلوه حوثي یاغیانو د یکشنبې په ورځ نومبر ۱۹ (لړم ۲۸) وویل چې دوی په سور سمندرګي کې د یو اسرائیلي سوداګر یوه کښتۍ نیولې او د یمن سواحلو ته یې لېږدولې ده.
دا اعلان څو ورځې وروسته له هغه وشو چې حوثي یاغیانو د غزې په تړانګه کې د حماس سره د اسرائیل د جګړې په لړ کې، په سمندر کې د اسرائیلي کښتیو په نښه کولو ګواښ وکړ.
د حوثیانو د پوځ ویاند یحیی سریع په یو بیان کې چې په ایکس (ټویټر) خپور شوی، وویل چې یاغیانو "یوه اسرائیلي کښتۍ ونیوله او د یمن سواحلو ته یې بوتله".
دا کښتۍ د یو جاپاني شرکت لخوا چلول کیږي، او د خوشې کولو لپاره یې توکیو مداخله کړې او په "مستقیم" ډول د یاغیانو سره په تماس کې شوې ده.
د جاپان د بهرنیو چارو وزیر یوکو کامیکاوا وویل، توکیو له اسرائیلو سره په تماس کې دی او له حوثیانو سره د مستقیم تماس سربیره، موږ له سعودي عربستان، عمان، ایران او نورو اړوندو هیوادونو څخه هم غوښتنه کوو چې د حوثیانو څخه په کلکه د بېړۍ او د عملې د غړو د ژر تر ژره خلاصون غوښتنه وکړي."
اسرائیل، جاپان او امریکا د بېړۍ نیول غندلي دي.
د اسرائیل پوځ ویلي له ترکیې څخه جاپان ته پر لار ددغه بیړۍ په ۲۵ کسیزه عملې کې د اسرائیلیانو برسېره د اوکراین، بلغاریا، فیلیپین، مکسیکو او نورو هېوادونو اتباع شامل دي.
د اسرائیل د صدراعظم بنیامین نتنیاهو دفتر ویلي، دغه کښتۍ "د یمني حوثي ملیشو له خوا د ایران په لارښوونه تښتول شوې ده."
ایران دغه تور رد کړی دی.
د دوشنبې په ورځ، د ایران د بهرنیو چارو وزارت ویاند ناصر کنعاني وویل چې د اسرائیل تورونه "بې اعتباره" دي او "د هغه وضعیت څخه د تیښتې معنی لري چې دوی ورسره مخامخ دي."
د سمندري امنیت شرکت "امبري" د معلوماتو په اساس، د موټرو لیږدوونکې دا کښتۍ د "رې کار کاریر" ده چې په اسرائیلي سوداګر ابراهیم "رامي" انګار پورې اړه لري.
اسرائیل د اکتوبر په اوومه د حماس تر واک لاندې غزې تړانګې باندې وروسته له هغه بمباري او ځمکني عملیات پیل کړل چې د اسرئیلي مقاماتو په خبره، د حماس په یو برید کې ۱۲۰۰ زیاتره ملکي اسرائیلیان ووژل شول او نږدې ۲۴۰ نور یرغمل شول.
د حماس چارواکي وايي، د اسرائيل په بمباريو او ځمکنيو عملیاتو کې د زرګونو ماشومانو په ګډون تر ۱۳۰۰۰ ډېر کسان وژل شوي دي.
د تلفاتو دغه شمېرې په خپلواک ډول ندي تائید شوي.
ایران، چې د حماس مالي او پوځي ملاتړ کوي، د دې ډلې د اکتوبر د اوومې برید "بریالیتوب" بللی، خو په دې کې یې مستقیم لاس لرل رد کړي دي.
فورم \ دبحث خونه