د امریکا د اریزونا ایالت په فینکس سیمه کې د رایو په یو مرکز د رایې شمیرنې بهیر
د امریکا د ۲۰۲۰ ولسمشرۍ ټاکنو کې د ډموکرات ګوند کاندید، جو بایډن رایې د پنسلوانیا په ایالت کې د جمهوري غوښتونکو د ګوند د کاندید او برحال ولسمشر ډونالډ ټرمپ څخه ډیرې شوي دي.
ښاغلي بایډن تیره ورځ په دغه ایالت کې تر ښاغلي ټرمپ ۵ زره ډیرې رایې درلودې خو اوس بایډن د ټرمپ نه ۲۹ زره رایې وړاندې دی.
که چیرته د دیموکرات ګوند کاندید، جوبایډن په دغه ایالت کې ګټونکی شي نو د ولسشمرۍ لپاره به هغه پاتې انتخاباتي رایې هم ترلاسه کړي چې د ټاکنو ګټلو لپاره ورته اړتیا لري.
جو بایډن د پنسلوانیا سربیره د جورجیا، ارزونا او نواډا په ایالتونو کې هم د ډونالډ ټرمپ څخه مخکې دی او په دغو ایالتونو کې د رایو شمیرنه لا هم روانه ده.
خو ښاغلي بایډن بیا هم تیره شپه د نومبر ۶( لړم ۱۶) خپلو ملاتړو سره د خبرو پر مهال د بریا اعلان ونکړ او ویې ویل ”د رایو شمیرنه یو ډیر واضح او قانع کوونکی حکایت لري، مونږ به په دغو ټاکنو کې ګټونکي شو. “
له بلې خوا ښاغلی ټرمپ د شمالي کرولینا او الاسکا په ایالتونو کې له جو بایډن څخه مخکې دی . ټرمپ تر اوسه ۲۱۴ انتخاباتي رایې ګټلې دي.
د ښاغلي ټرمپ لپاره د پنسلوانیا ایالت ګټل ډیر مهم دي ځکه چې که باقي ټول ایالتونه وګټي او په پنسلوانیا کې یې وبایلي نو هغه انتخاباتي رایې نشي پوره کولی چې دده بریا تضمین کړي.
