د امریکا په متحده ایالاتو کې د نومبر د درېیمې په انتخاباتو کې رای ورکوونکو د جمهوري ریاست او د کانګرس کاندیدانو ته د رای ورکولو سربیره په یو شمیر ایالتونو کې د یو لړ نورو مسایلو په هکله رای ورکړې دي.
د اعلان شویو نتیجو له مخې په نیوجرسي او اریزونا ایالتونو اکثر رای ورکوونکو د مروانا د تفریحي مصرف په ملاتړ رای ورکړې دي او پدې توګه د مروانا څکل په دغو دوو ایالتونو کې هم قانوني کیږي.
همداشان په اوریګن ایالت کې هم رای ورکوونکو د لومړي ځل لپاره د زیات عمر لرونکو کسانو لپاره د سیلوسایبین درملو نه استفاده کولو ته رایه ورکړه چې د جادویي ډینګریو په نامه هم شهرت لري. څیړنو ښودلې چې سیلوسبین د اضطرابي اختلالاتو او نورو رواني او روحي ناروغیو لپاره ګټور دي.
همداشان په انتخاباتو کې د مسیسیپي او جنوبي دکوتا په ایالتونو د مروانا د استعمال په اړه پوښتنه شوی وه چې ددې ایالتونو اکثر رای ورکوونکو په جنوبي دکوتا کې د هغې درماني او تفریحي استعمال ته او په مسیسیپي کې د درملنه لپاره دد مروانا استعمال ته رایه ورکړه.
د امریکا د متحده ایالتونو د جمهوري ریاست د انتخاباتو وروستی حال سمیع الله جلالزی وړاندې کوي.
جوبایډن د مېین په ایالت کې درې انتخاباتي رایې وګټلې. جوبایډن تر دا مهال ۲۲۷ رایې ګټلې دي او سیال یې ۲۱۳ رایې تر لاسه کړي دي. په دغو ټاکنو کې باید یو نوماند ۲۷۰ انتخاباتي رایې خپلې کړي. لا هم د اوو ایالتونو رایې بشپړې شوي نه دي او د رایو شمیرنه دوام لري.
د شمیرل شویو رایو څخه ښکاري چې د کانګرس د استازو په مجلس کې اکثریت دموکراتان د خپلو څوکیو د ساتلو په لور روان دي، خو د څو ایالتونو د نتیجو د ناڅرګندتیا په خاطر د سنا مجلس د څوکیو وضعیت تر اوسه ندی مشخص شوی.
له بلې خوا جمهوري غوښتونکي سناتور مچ مک کانل چې د سنا په مجلس کې د جمهوري غوښتونکو د اکثریت مشر دی د اوم ځل لپاره د سنا غړیتوب ترلاسه کړ او تر راتلونکو شپږو کلونو لپاره به د سنا مجلس کې د کنتکي ایالت سناتور وي.
