د افغانستان لپاره د ملګرو ملتونو سیاسي استازولۍ (یوناما) په لوګر ولایت کې د افغانستان د دولت پلوه ځواکونو په هوايي برید کې د ۹ ملکي وګړو وژل تائید کړي دي.
دا برید د یکشنبې په شپه ناوخته د لوګر ولایت په برکي برک ولسوالۍ کې شوی دی.
یوناما د سېشنبې په ورځ (زمري ۱) په یو بیان کې ویلي، چې په وژل شوو کسانو کې درې ښځې هم شاملې دي.
د بیان له مخې په دې برید کې شپږ تنه ټپیان شوي دي.
یوناما د پېښې له قُربانیانو څخه د ملاتړ او د برید په تړاو د ابتدايي تحقیقاتو د موندنو د خپرولو غوښتنه کړې ده.
د ملکي وګړو د مرګ ژوبلې دغه نوې پېښه پر داسې مهال رامنځته کېږي چې تېره اونۍ د افغانستان د ملي امنیت شورا په پوځي عملیات کې د ملکي زیانونو د ارزونې کمېټې د رامنځته کېدو خبر ورکړ.
په افغانستان کې د ملکي وګړو د خوندیتوب او عدالت غوښتنې ګروپ د معلوماتو لهمخې د چنګاښ میاشتې له پیل څخه تر اوسه پوري نژدې۲۰۰ ملکي وګړي د تاوتریخوالې په پېښو کې وژل شوي او شاوخوا ۴۰۰ نور ټپیان شوي دي.
د دغه ګروپ مشر عزیز احمد تسل نن سې شنبه امریکا غږ ته وویل، چې تېره میاشت د ملکي مرګ ژوبلې له اړخه نسبت تېرو شپږو میاشتو ته تر ټولو مرګونې وه.
د افغانستان دفاع وزارت ویلي، چې دا برید د لوګر ولایت د برکي برک ولسوالۍ په دشت خاکي کلي کې، له چاودیدونکو موادو څخه د یو ډک موټر د له منځه وړلو په هدف شوی دی.
دفاع وزارت په دې برید کې طالبانو ته د درنو تلفاتو اړولو خبر ورکړی او ویلي دي، چې په برید کې د ملکي وګړو د تلفاتو د ادعاو په اړه څیړنه کوي او نتایج به یې له خلکو سره شریک کړي.
د افغانستان د جمهور رئیس ویاند صدیق صدیقي په لوګر کې د ملکي تلفاتو په اړه خبریالانو ته وویل، چې د پوځي عملیاتو پر مهال د ملکي وګړو خوندیتوب د افغان ځواکونو په لومړیتوبونو کې ځای لري.
ښاغلي صدیقي ټینګار وکړ، که چیرې په کوم ځای کې د ملکي خلکو د تلفاتو احتمال وي، افغان ځواکونه خپل عملیات ودروي.
