په افغانستان کې د ملګرو ملتونو د سرمنشي ځانګړې استازې دیبورا لاینز قطر ته د خپل سفر په مهال د طالبانو له مرکچي پلاوي سره د افغانستان د سولې له بهیر څخه د ملګو ملتونو د ملاتړ په اړه خبرې کړې دي.
یوناما د سېشنبې په ورځ جولای ۶ (چنګاښ ۱۵) په خپل ټویټر پاڼه کې لیکلي چې د سولې د مذاکراتو بېرته پیلول په افغانستان کې د تاوتریخوالي د پای ته رسولو یوازینۍ لاره ده.
یوناما زیاته کړې: "د سولې مذاکرات باید رېښتیني وي او د جګړې د پای ته رسولو او د افغانستان خلکو ته د هیلې بخښولو لپاره باید ورته لومړیتوب ورکړل شي".
ټاکل شوې چې اغلې لانیز په قطر کې د افغانستان د اسلامي جمهوري دولت د مرکچي پلاوي سره هم خبرې وکړي.
د قطر په پلازمینې دوحه کې د افغانستان د اسلامي جمهوري دولت او د طالبانو د مرکچي پلاو ترمنځ بینالافغاني مذاکرات له څه مودې راهیسې په ټپه ولاړ دي.
له دې وړاندې چارواکو ویلي چې په وروستیو اونیو کې د دواړو خواو ترمنځ هېڅ غونډه نه ده شوې.
یوناما له دې مخکې هم ویلي و چې ملګري ملتونه به د سولې هڅو د جاري ساتلو او یو عادلانه او تلپاتې توافق ته د رسېدلو لپاره د افغانستان د اسلامي جمهوري دولت او د طالبانو له استازو سره خپلو سلامشورو ته دوام ورکړي.
یوناما ټینګار کړی چې په افغانستان کې د سولې د ټینګولو لپاره هڅې باید له خنډ او ځنډ سره مخ نشي.
د افغانستان حکومت طالبان تورنوي چې دغه ډله پلمې کوي او له سیاسي لارې سولې ته په رسېدلو باور نلري او غواړي چې د زور له لارې واک تر لاسه کړي.
خو طالبانو د افغانستان حکومت په قطر کې د سولې په مذاکراتو کې د خنډ لامل ګڼلی دی.
