د افغانستان امریکايي پوهنتون پخوانی ښوونکی ټیموټی ویکس چې درې نیم کاله یې د طالبانو په بند کې تېر کړي د امریکا متحده ایالاتو او طالبانو تر منځ د سولې توافق په مراسمو کې ګډون کوي.
د طالبانو ویاند ذبیح الله مجاهد نن پنجشنبه (د کب ۸) په خپل ټویټر پاڼې کې ویلي چې ښاغلی ویکس دوحې ته رسېدلی دی.
د اسټرالیا اصلي اوسېدونکی ۴۸ کلن ټیموټي ویکس او ۶۰ کلن امریکايي کیفن کینګ د ۲۰۱۶ زېږدیز کال د اګسټ په اومه کابل کې د طالبانو له خوا برمته شول.
یادو کسانو کابل کې د امریکايي پوهنتون ښوونکي وو چې د څه باندې درې نیم کاله بند وروسته را خوشې شول.
څلور میاشتې مخکې طالبانو دغه ښوونکي د خپلو هغو درې مهمو غړو هر یو انس حقاني، مالي خان، او عبدالرشید سره تبادله کړل چې د افغان حکومت په بند کې وو.
افغانستان سره د ټیموټي ویکس مینه اوس مهال ډېره شوې.
د ټویټر ځینې کاروونکي وايي چې د (افغانستان سوله) په نامه ټویټر پاڼه د ټیموټي ویکس پاڼه ده.
په دې پاڼې کې چې د ټیموټي عکس هم پرې شته تر ډېره د سولې پیغامونه خپریږي او د ټیموټي له قوله ویل شوي چې "طالبانو سره زما درې نیم کاله بند، دغه هېواد او افغانانو سره زما ژوند د تل لپاره ونښلوه."
ټاکل شوې چې راروانه شنبه قطر کې د طالبانو او امریکا د سولې تړون لاسلیک شي.
