د طالبانو د حکومت د عامې روغتیا وزارت د افغانستان په ګاونډي هیواد پاکستان کې د بیزو تڼاکې د ناروغۍ د پیښو د ثبت وروسته ویلي چې هڅه کوي چې په سرحدي صفري نقطو کې ددغې ناروغۍ مخنیوی وکړي او کنټرول یې کړي.
ددغه وزارت ویاند شرافت زمان امرخیل د سه شنبې په ورځ اګست ۲۰( زمري ۳۰) خبریالانو ته په یو استولي ویډیوي پیغام کې ویلي چې ددغې ساري ناروغۍ مثبتې پیښې د پاکستان په ګډون په ځینو هیوادونو کې ثبت شوي دي.
د امرخیل د وینا پر اساس د بیزو تڼاکې ساري ناروغۍ ته په پاملرنې ددغې ناورغۍ د مخنیوي لپاره مخکې له مخکې لازم اقدامات اړین دي، چې د همدې له امله د عامې روغتیا وزارت په اړه چمتوالی نیولی دی.
امرخیل وویل چې په تیرو څو ورځو کې د عامې روغتیا وزارت اړوند ریاستونو او ادارو ته وظیفه سپارل شوې چې په افغانستان کې ددغې ناروغۍ د خپریدو د مخنیوي لپاره اقدامات ترسره کړي.
هغه وویل: " مونږ په خپل ټول توان سره هڅه کوو ترڅو په افغانستان کې ددغې ناروغۍ د خپریدو مخه ونیسو، له نیکه مرغه مونږ سره په افغانستان کې ددغې ناروغۍ کومه مثبته پیښه نه ده ثبت شوې، البته کوښښ کوو چې د قوي تدابیرو په پلي کولو سره ددغې ناروغۍ د خپریدو مخه ونیسو".
د طالبانو د حکومت د عامې روغتیا وزارت ویاند وویل چې دا چې په افغانستان کې د بیزو د تڼاکې د ناروغۍ د خپریدو څخه څنګه مخنیوی وشي په دې اړه د نړیوالو او داخلي ادارو سره سلامشورې شوي دي او ځینې لومړنۍ کړنلارې په دې برخه کې ترتیب شوي هم دي.
امرخیل وویل:" ددغو کړنلارو پراساس کولای شو په صفري نقطو او هغو سیمو کې چې د چاڼولو امکانات شتون لري ددغې ناروغۍ د خپریدو مخنیوی وکړو".
همداشان د طالبانو د حکومت دعامې روغتیا وزارت ویلي چې ددغې ناروغۍ سره د مقابلې لپاره په پام کې لري چې د ظرفیت د لوړولو او عام پوهاوې په برخو کې پروګرامونه پیل کړي او هم په سرحدي سیمو کې ددغې ناروغۍ د چاڼوالو چارې زیاتې کړي.
په عین وخت کې ددغه وزارت سرپرست نورجلال جلالي د بیزو د تڼاکې ناروغۍ د مهارلو په تړاو یوې غونډې ته ویلي: هڅه کوو د هیواد په صفري نقطو کې ددې ناروغۍ مخنیوی وکړو او هیوادوال ددغې ناروغۍ څخه وژغورو. په دې تړاو د مختلفو نویوالو سازمانونو سره غونډې شوي دي او همدارنګه د همغږۍ او امکاناتو په چمتوکولو باندې بوخت یو".
د عامې روغتیا وزارت په یوه خبرپاڼه کې ددغه وزارت د پالیسي او د روغتیا د پراختیا د معین محمد حسن غیاثي له قوله ویلي چې د روغتیا د نړیوال سازمان او د مهاجرت د نړیوال سازمان سره یې ددغې ناروغۍ د پیښیدو په صورت کې اړو کسانو ته د خدمتونو د برابرولو په لارو چارو هم خبرې کړي دي.
دغه وزارت ویلي چې دغو دواړو نړیوالو سازمانو ورته د مرستې د چمتو کولو ډاډ ورکړی دی.
د اېم پاکس یا د بیزو تڼاکې ناروغي یوه ساري ناروغي ده چې په دې ویروس د اخته څارویو څخه انسانانو ته انتقالیږي او د فزیکي تماس له لارې د انسانانو ترمنځ خپریږي. دا ناروغي په کانګو کې متمرکزه ده ، چې شاوخوا ۱۰۰ میلیون نفوس لري.
دا ویروس پخوا د بیزو د تڼاکو په نوم یادېده او په لومړي ځل په ۱۹۵۸ کې په ډنمارک کې په هغو بیزوګانو کې وموندل شو چې د څیړنو لپاره ساتل کیدې. دا ناروغي په انسانانو کې په لومړي ځل په ۱۹۷۰ کې په کانګو کې وموندل شوه.
د کانګو د روغتیا وزیر سمیول راجر کامبا پدې اونۍ کې په یو ویډیويي پیغام کې وویل چې په دغه هېواد کې سږکال ۱۶۰۰۰ د اېم پاکس احتمالي قضیې او له دې کبله د ۵۴۸ کسانو مړینه ثبت شوې ده.
هغه وویل چې حکومت د "اېم پاکس پروړاندې د واکسین کولو ملي ستراتیژیک پلان" ځای په ځای کړی، او د دې ناروغۍ د کنټرول لپاره د نورو اقداماتو پلي کولو هڅه کوي.
فورم \ دبحث خونه