د وسله والو طالبانو د ګواښونو له امله د ارزګان ـ کندهار لار نن جمعه د عامو ټرافیکو پرمخ تړل شوې ده.
د لارې د بندېدو له امله دغه راز د کندهار په شمالي برخه کې د ترینکوټ د ټرانسپورتي اتحادیو په تم ځای کې سل ګونه موټر د لارې خلاصون ته منتظر پاته دي.
د ارزګان پر لویه لار د ټرانسپورتي اتحادیو مسئولین وايي، چې د وسله والو طالبانو له لوري يې یو اخطاریه لیک تر لاسه کړی چې پکښې د لارې پر سر د ماینونو د ګواښونو او امنیتي پېښو له کبله د تګ راتګ پر مهال مسئولیت دوی ته راجع شوی دی.
د ارزګان د ترانسپورتي اتحاديې مسئول نور محمد نن جمعه «وږې پر۱۵مه» امریکا غږ ته وويل، چې د یادو ګواښونو له کبله د نن سهار راهیسې له کندهار څخه ارزګان ته او له ترینکوټ څخه کندهار ښار ته هیڅ وسایطو تګ راتګ نه دی کړی.
ده وويل:"موږ په ډیرو پېچلو ستونزو کې را ګیر یو، تر دوه سوه پوري وسایط په ترینکوټ او په همدې شمېر کې هم په کندهار کې د لارې خلاصون ته منتظر دي، د سهار راهیسې مو هیڅ تګ راتګ نه دی کړی، د ګیزاب، دهراود، چنارتو،خاص اروزګان، چورې او ترینکوټ وسایط چې هر ورځ خوراکي او اړین توکي سیمي ته وړي تر څلور سوه هم زیاتيږي موږ ته هم د ماینونو ګواښونه شته هم د جګړې او نیول کیدو موږ په جګړه کې د ښکېلو غاړو څخه زموږ د ستونزو د حل غوښتنه کوو."
بلي خوا ته د کندهار او ارزګان ولایتونو امنیتي مقامات هم پر یاده لار ستونزې مني، خو وايي، چې د حل لپاره به يې بېړني ګامونه واخلي.
د کندهار والي حیات الله حیات امریکا ته وويل، چې تېره ورځ په جنوب کې د قاطع ملاتړ ماموریت له قومندان سره په ګډه د کندهار ارزګان د لارې د امنیت او بیا رغونې لپاره سیمي ته تللی وو او هر څه يې له نږدې څخه څيړلي.
نوموړي وويل چې ژر به د یادې لارې د امنیت او هم د بیا رغونې په برخه کې په بیړني ډول کارونه پيل شي.
حیات امریکا غږ ته وویل:"موږ سیمې ته پرون سفر در لود زموږ لپاره د ولسوالیو او ګاونډیو ولایتونو پوري د غځېدلو لارو امنیت لومړیتوب دی، په دې برخه کې موږ د خاکریز لار امن کړې او د ارزګان کندهار د لارې د رغیدو او امنیت لپاره پلان جوړ شوی او ژر به عملي شي."
دغه راز د اروزګان امنیه قومندان سمونوال محمد خطاب خنجري اشنا راډیو ته وويل چې افغان امنیتي ځواکونو په ګډه د ارزګان – کندهار د لويې لارې د امنیت لپاره نوي تدابیر تر لاس لاندي نیولي.
د کندهار – ارزګان لویه لارې نا امنه برخه د کندهار د شاه ولیکوټ او د ارزګان د مرکز ترینکوټ ترمنځ پرته سیمه ده چې ټوله څلوېښت کیلو میتره ته رسیږي.
وسله والو طالبانو تر دا مهاله د دغه لارې د بندېدو په اړه څه نه دي ویلي.
