په افغانستان کې د قاطع ملاتړ د ماموریت قومندان جان نیکلسن وايي چې افغان ځواکونو د طالبانو ۸۰ سلنه بریدونه شنډ کړي دي.
جنرال نیکلسن وویل چې د تېرو پنځو کلونو په پرتله په ۲۰۱۸ کال کې د " دښمن" بریدونه ۳۰فیصده کم شوي دي. هغه ونه ویل چې " دښمن" (طالبانو) پنځه کال مخکې څومره بریدونه کول او اوس یې څومره کړي دي؟
دغه امریکايي قومندان دا خبره هم وکړه چې د طالبانو د "الخندق" د عملیاتو د اعلان راوروسته د روان کال د فبرورۍ او اپریل ترمنځ میاشتو کې د طالبانو په بریدونو کې د ۱۰-۱۲ سلنه کموالی راغلی دی چې د هغه په خبره دا یو پرمختګ دی.
هغه وویل چې د طالبانود بریدونو لوی هدف تبلیغات دي او دغه ډله هڅه کوي چې دمطبوعاتو پام ځان ته واړوي.
جنرال نیکلسن پداسې حال کې د طالبانو د بریدونو د کموالي خبره کوي چې همدا نن (چهارشنبه مۍ۳۰) په کابل کې وسله والو د افغانستان د کورنیو چارو پر وزارت ډله ییز برید وکړ.
افغان چارواکي وايي اته بریدګر یې ووژل او یو پولیس هم ووژل شو او یو شمېر نور یې ژوبل شول. بریدګرو د بهرنیو ځواکونو یونیفورم اغوستي وو چې ښاغلي نیکلسن دا کار د اندېښنې وړ وباله.
جنرال نیکلسن وویل "فکر کوم دا برید طالبانو کړی دی، ځکه په تېر کې هم طالبانو دا ډول بریدونه کړي دي. د بریدګرو دهویت له معلومولو وروسته به نور جزییات خپاره کړو".
که څه هم امریکايي ځواکونه په افغانستان کې د طالبانو د بریدونو د کموالي خبره کوي خو په جګړه کې د ملکي افغانانو د مرګ ژوبلې په شمیر کې کموالی نه لیدل کیږي.
ملګري ملتونه وايي د ۲۰۱۸ کال د جنورۍ له لومړۍ نیټې د مارچ تر وروستۍ نیټې پورې "۷۶۳ ولسي افغانان وژل شوي او ۱۴۹۵ نور ټپیان دي".
د تېرکال د همدغې مودې په پرتله سږکال د "حکومت ضد عناصرو ته منسوب شوي ملکي تلفات کې شپږ سلنه زیات" شوي. ملګري ملتونه د دغو تلفاتو څه باندې ۸۰ سلنه مسولیت پر "مخالفانو" اچوي، خو طالبان یې نه مني.
