د هسپانیا په مرکز مادرید کې پولیس وایي د کوکاینو د قاچاقو یوه ۱۲ کسیزه شبکه یې نیولې ده.
پولیسو د یکشنبې په ورځ مارچ ۱۴ (۲۴) وویل چې له دغو کسانو څخه یې د ۲۹۸۸۰۰ ډالرو په ارزښت یو قیمتي فېراري موټر، د وسلو یوه ذخیره او یوه جاپانۍ توره هم ترلاسه کړي دي.
د هسپانیا ملي پولیس وایي دا یوه خطرناکه شبکه وه او د دغو کسانو د نیولو په عملیاتو کې ۶۰۰ کیلو ګرام کوکاین او نورې وژونکې آلې هم ترلاسه شوي دي.
همدغه راز پولیسو د دغې شبکې د نیولو په عملیاتو کې څه باندې ۸۳۶زره ډالر او د فېراري په ګډون ۲۰ قیمتي موټرونه هم نیولي دي.
پولیس وايي چې د نشه يي توکو د مسایلو یو مدافع وکیل به د دغې شبکې حقوقي موضوعات مخې ته وړل او د سازمان غړو به په اپارتمانونو کې د کوکاینو د ساتلو لپاره شفرونه او کوډونه استعمالول.
د دغې شبکې غړي به په قیمتي کورونو کې اوسېدل خو د کاروبار کوم څرک یې نه لګېده.
پولیسو په یوې اعلامیې کې د تحقیق کوونکو له خولې لیکلي دي چې دا د هسپانیا په مرکز کې د کوکاینو تر ټولو ستره شبکه وه.
په یوې ویدیو کې ښودل کیږي چې پولیس افسران د پېسو کڅوړې انتقالوي.
د دغې شکبې مشر د مراکش و او په کولمبیا، مراکش، هسپانیا او شمالي اروپا کې به یې د نشه يي توکو د نورو قاچاق کوونکو ډلو سره اړیکې تېنګولې.
د هسپانیا پولیسو په دغو عملیاتو کې د کولمبیا سره هم همکاري کړې ده.
