په متحده عربي اماراتو کې د بې ساري بارانونو او سیلاب دوه اوونۍ وروسته، د پنجشبنې په ورځ مۍ دوهمه (غوايي ۱۳) د شدید باران د یوې بلې څپې له کبله دفترونه او ښوونځي تړل شوي دي.
د هوا پېژندنې ملي ادارې وویل چې طوفاني باد او باران تېره شپه د تیلو د زیرمو لرونکي دغه بډای هېواد کې دوام درلود او په ځینو سیمو کې په ځايي وخت د سهار تر اتو بجو، تر ۵۰ ملي مترو باران ورېدلی دی.
دغه باران د دوبۍ د نړیوال هوايي ډګر او شاوخوا سیمو کې د سیلاب سبب شوی او یو شمېر پروازونه لغوه شوي دي.
د اماراتو او فلای دوبۍ هوايي شرکتونو مسافرو ته د پروازونو د ځنډېدو په اړه خبرداری ورکړی او ډیر حکومتي دفترونه او ښوونځي تړل شوي دي.
وروستی باران د اپریل ۱۶ د شاوخوا ۲۵۰ ملي مترو باران له کچې څخه کم وو. په تیر ځل باران کې د اماراتو ډیرې سیمې اوبو لاندې کړې وې، په زرګونو پروازونه لغوه شوي او له کبله یې لږ تر لږه څلور کسان مړه شوي وو.
د پنجشنبې په ورځ، په خپرو شویو تصویرونو کې د دوبۍ او شاوخوا ځینو سیمو کې پر سرکونو پرېښودل شوي موټرونه لیدل کیږي چې اوبو لاندې کړي دي.
له دې یوه ورځ وړاندې په سعودي عربستان کې هم د سختو بارانونونو له کبله سرکونه او کورونه له اوبو لاندې شوي او په ډیرو سیمو کې ښوونځي تړل شوي وو.
د ساینس پوهانو یوې ډلې تېره اونۍ وویل چې په عربي هېوادونو کې وروستي شدید بارانونه د انسان په لاس د تیلو د سونګ له کبله د نړیوالې تودوخې لوړوالی دی.
په متحده عربي اماراتو کې د تیرې میاشتې باران ددغه هېواد په تاریخ کې ساری نه درلود چې له کبله یې په ګاونډي عمان کې لږ تر لږه ۲۱ تنه مړي شوي وو.
فورم \ دبحث خونه