سعودي عربستان پلان لري چې د ۱۰ میلیارد ډالرو په لګښت د پاکستان د ګوادر په ړورو ساحلي اوبو کې د تیلو چانځای جوړ کړي.
دا خبرې سعودي عربستان د انرژۍ چارو وزیر خالد الفالح د شنبې په ورځ د پاکستان د ګوادر په بندر کې وکړې چې د چین په مرسته جوړ شوی دی.
پاکستان د سختو اقتصادي ستونزو سره مخامخ دی او ددې هیواد صدراعظم عمران خان غواړي هیواد ته بهرنۍ مرستې او پانګې راجلب کړي.
تیر کال سعودي عربستان پاکستان ته ۶ ملیارد ډالرو مرستو ژمنه وکړه چې د خامو تیلو د وارداتو لګښت په کې شامل دی.
د سعودي د انرژۍ وزیر وویل "سعودي عربستان غواړي د تیلو د چانځای په جوړولو او د پاکستان او چین په اقتصادي دهلیز کې په شراکت سره د پاکستان اقتصادي وده با ثباته کړۍ".
ښاغلي الفالح وویل چې د سعودي عربستان ولیعهد محمد بن سلمان به د فبرورۍ په میاشت کې پاکستان ته سفر وکړي چې دغه هوکړه لیک لاس لیک کړي. هغه زیاته کړه چې سعودي به د پاکستان په نورو سکتورونو کې هم پانګونې وکړي.
د چین او پاکستان د اقتصادي دهلیز د پروژۍ لپاره بیجینګ د ۶۰ میلیارد ډالرو د لګښت ژمنه کړې ده چې په کې د بریښنا د تولید د مرکزونو، عمده لویو لارو، د نویو او موجودو ریل ګاډو پټلیو جوړول او رغول او همداشان د پراخو بندرونو جوړول شامل دي.
له بلې خوا د پښتون ژغورنې غورځنګ مشر منظور پښتین ویلي دي چې د چین ـ پاکستان اقتصادي لارې پروژو کې د پښتنو خاوره او وسایل کارېږي، خو د هغه په وینا ددې پروژو زیاته ګټه پنجاب ته رسېږي.
د رویترز اژانس د پاکستان تیلو د وزیر غلام سرور خان له خولې لیکلي چې "په ګوادر کې د تیلو د چاڼځای په جوړولو سره به سعودي عربستان د سيپېک په نامه د چین – پاکستان اقتصادي دهلیز د پروژې مهم شریک شي.
