په سعودي عربستان کې چارواکي وایي امنیتي ځواکونو شنبه جون اتمه ( غبرګولي ۱۹) د مکې معظمې څخه پداسې حال کې سلګونه زره نا ثبت شوي حج کوونکي ایستلي چې بله اوونۍ پدې هیواد کې د حج د فریضې ادا کولو مراسم پیلیږي.
د سعودي عربستان چارواکو ویلي چې تیر کال دې هیواد ته څه باندې ۱.۸ ملیون وګړي د نړۍ بیلا بیلو هیوادونو څخه حج کولو لپاره ورغلي او د دومره لوړ شمیر کسانو د تنظیم چارې د سعودي عربستان لپاره یوه ستره اندیښنه ده.
هغوي چې تازه د مکې معظمې څخه ایستل شویدي، ۱۵۳۹۹۸ یې د بهرنیو هیوادونو اتباع دي چې د سیلانیانو ویزو تر لاسه کولو وروسته سعودي عربستان ته ورغلي و او بیا د مکې په ښار کې ځای پر ځای شوي و.
د سعودي رسمي خبري اژانس په راپور کې ویل شوي چې دې کسانو د حج کولو لپاره ځانګړې ویزې نه بلکې د سیاحت ویزې درلودې.
د دې خبري اژانس په راپور کې همدارنګه ویل شوي چې پولیسو ۱۷۱۵۸۷ نور داسې کسان هم د مکې څخه ایستلي چې په سعودي عربستان کې ژوند کوي کوي خو د مکې اوسیدونکي ندي او حج ادا کولو لپاره یې اجازې هم نه وې تر لاسه کړې.
په سعودي عربستان کې سږ کال د حج رسمي مراسم د روانې جون میاشتې په ۱۴ مې نیټې پیلیږي.
دا چې د حج کولو لپاره سعودي عربستان ته تګ او رسمي اجازه تر لاسه کول ګران دي او هر کال د نړۍ هر هیواد ته محدود شمیر خلکو ته اجاز ورکول کیږي، په سعودي کې دننه او د باندې ډیر وګړي کوښښ کوي په غیر رسمي لارو چارو ځانونه د حج په موسم کې دې هیواد ته ورسوي.
په تیرو کلونو کې د حاجیانو ګڼه ګوڼه خطرناکه ثابت شوې ده. په ۲۰۱۵ کې مکې ته نږدې په منا کې د "شیطان په ډبرو ویشتلو" د مراسمو په ګڼه ګوڼه کې خلک تر پښو لاندې شول. د حج په دغه ترټولو خونړۍ پېښه کې شاوخوا ۲۳۰۰ کسان مړه شول.
د حج او عمرې وزارت یو چارواکي چې له رسنیو سره د خبرو د اجازې د نه لرلو له کبله د نوم له ښودلو ډډه کوي، وویل چې ددغه ډول خونړیو پیښو د مخنیوي لپاره، د سعودي چارواکي اړ شوي چې په وروستیو کلونو کې د غیر راجستر شویو حاجیانو پر وړاندې اقدام وکړي.
دغه چارواکي وویل: "د مکې ساحه ډیره محدوده ده، او د لوی شمیر غیرقانوني کسانو شتون د ګڼې ګوڼې او بسونو د تګ راتګ د تنظیم مخه نیسي او دا کار د خلکو تر پښو لاندې کېدو لامل کیدای شي."
د غیر قانوني حاجیانو او د هغوی د لیږدوونکو جریمه له ۱۰ زره سعودي ریال (۲۶۶۶ ډالرو) څخه پیل کیږي.
د دولتي رسنیو د راپورونو له مخې، له تېرې میاشتې راهیسې چارواکو د حج اړوند "درغلیو" په تور لږ تر لږه ۲۰ کسان نیولي، چې ډېری یې مصریان دي.
مکې ته د غځېدلیو سرکونو تر څنګ پر لوحو لیکل شوي، "له جواز پرته د حج اجازه نشته." خو د غیر رسمي حج کولو ستونزه پر ځای پاتې ده
په ۲۰۱۹ کې سعودي د ګرځندوی ویزې معرفي کړې چې د غیر راجستر شوي حاجیانو په ګډون سعودي عربستان ته یې د خلکو تګ د پخوا په پرتله خورا اسانه کړ.
د ګرځندوی یو استازي د نیول کېدو د ویرې له کبله د نوم نه ښودلو په شرط وویل: "عرفات ته د حاجیانو د راوړلو لپاره لا هم یو میلیون لارې شته. زه سل بسونه لرم چې عرفات ته ننوځي. ایا دا ټول پلټل کیږي؟دا ناشونې ده."
سږکال د حج په موسم کې تمه کیږي چې ګرمي تر پځوا ډیره زیاته وي او د تودوخې درجه د سانتي ګراد په کچه ۴۴ اټکل شوې ده.
فورم \ دبحث خونه