د پاکستان وزیراعظم عمران خان په پاکستان کې مظاهره کونکو ته خبردارې ورکړیدی چې حکومت دیته نه مجبوروي چې سخت اقدامات وکړي او په ټولنیزو رسنیو د هغه وینا ته بیل بیل غبرگون ښودل شوی.
ښاغلي خان دغه خبرداری هغو مظاهره کونکو ته ورکړیدی چې په پاکستان کې سترې محکمې د یوې عیسویي ښځې اسیه بي بي د ازادولو امر وکړ. په هغې په ٢٠٠٩ کال کې دین د سپکاوي تور لگیدلی و او د پاکستان یوې محکمې ورته د اعدام سزا اورولي وه.
د اسیې بي بي د قضیې د ملاتړ له کبله په پاکستان کې دوه سیاسي مشران، یو د پنجاب گورنر سلمان تاثیر په ٢٠١١ کال کې د هغه خپل امنیت ساتونکي ممتاز قادري وواژه او بل د مذهبي اقلیتون وزیر شهباز بټي هم په کال ٢0١١ کې ووژل شو.
عمران خان مظاهره کونکي یوه کوچنۍ ډله وبلله. هغه وویل "یوې "وړې طبقي" د سترې محکمې فېصلې ته چې کوم ډول ردعمل وکړو، د پوځ مشر او د قاضیانو خلاف یې کوم ډول الفاظ استعمال کړل دا د منلو وړ نه دي."
د یادونې وړ ده چې د پاکستان په مختلفو ښارونو کې د یوې مذهبي ډلې تحریک لبیک یا رسول الله مشر خادم حسین پلویانو مظاهرې پیل کړیدی.
مظاهرچیانو کې ځینو د پوځ لوی درستیز او قاضی القضا ته د بدو عواقبو اخطارونه ورکړیدي.
د عمران خان وینا ته غبرگون
د عمران خان وینا ته په ټولنیزو رسینو سمدستي غبرگون وښودل شو او د هغه ځینو سیاسي مخالفینو هم د هغه کلک دریځ وستایو.
د سترې محکمې د فېصلې وروسته د عمران خان ملت ته وینا ځکه هم مهمه گڼل کیږي چې په پاکستان کې مذهب ته د سپکاوې مسله ډیره جدي بلل کیږي او اکثر سیاسي مشران پدی مسله د څرگندونو نه ډډه کوي.
د پاکستان د جیو ټلویژن خبریال طلعت حسین ولیکل
"عمران خان پخپله وینا کې ملت ته هغه څه څرگند کړل چې د پاکستان مطبوعاتو خلکو ته نه ویل، هغه د پوځ د لوی درستیز او د قاضي القضا ضد د مظاهرکونکو ویناگانې دي."
خبریال مبشر زیدي د عمران خان ملت ته وینا پدی الفاظو وستایله.
"د عمران خان وینا هغه څه دي چې محمد علي جناح د پاکستان لپاره غوښتل. دغه اویا کلونه وخت واخیست ترڅو مونږ د خپل نظریې سره روغه وکړو."
په ټویټر زیاتره کسانو د عمران خان د دریځ ملاتړ وکړ خو بیا ځینو اسیه بي بي د مذهب د سپکاوې مسوله وبلله.
د جیو نیوز خبریال انصار عباسي په خپل ټویټر ولیکل چې پکار ده د عمران خان حکومت د سترې محکمې د پریکړې ضد د بیا نظر کتنې خواست وکړي. هغه وویل چې د مظاهرهکونکو اندیښنې پر ځای دي.
