په ترکیې کې جمهوررئیس اردوان د یو فرمان په ترڅ کې په زرګونو خصوصي ښوونځي، خیره موسسې او نورې ادارې تړلې دي.
په ترکیې کې د بیړني حالت د اعلانیدو وروسته، جمهوررئیس رجب طیب اردوان په خپل لومړي فرمان کې د ۱۰۰۰ په شاووخوا کې خصوصي ښوونځي او ۱۰۰۰ نورې ادارې، د خیره موسسو په شمول، تړلې دي.
د ترکیې چارواکو ویلي دي چې دغه کار یې د دې لپاره کړی دی چې دغه ادارې په امریکا کې میشت د فتح الله ګولن سره ارتباط درلود. ترکیې په فتح الله ګولن او د هغه په طرفدارانو باندې تور لګولی دی چې د حکومت د نسکورولو لپاره یې کودتاه کړې وه.
بل پلو ته، اردوان د یوه فرمان په صادرولو سره په توقیف کې د مشکوکو کسانو د ساتلو موده هم غځولې ده.
د توقیف موده پخوا څلور ورځې وه خو د نوي فرمان په صادریدو سره اوس چارواکي کولای شي چې یو مظنون تر ۳۰ ورځو پورې وساتي.
د ترکیې یو دولتي خبرې آژانس ویلي دي چې د ترکیې چارواکو د ګولن یو وراره هم نیولی دی.
چارواکو ویلي دي چې د ګولن وراره محمد سید ګولن د ارزروم په ښار کې نیول شوی دی او هغه به انقرې ته انتقال شي. دا لومړی ځل دی چې د ناکامه کودتاه په تړاو د ګولن یو خپل نیول کیږي.
د اردوان منقدین دا ویره لري چې هغه به د ناکامه کودتاه نه د خپلو مخالفینو د ځپلو لپاره کار واخلي.
د مثال په توګه، په هغو ادارو کې چې تصیفه کیږي یوه یې هم د ترکیې د قاضیانو او څارنوالانو اتحاده هم شامله ده. دغه هغه اتحادیه ده چې د اردوان د عدالت او انصاف د ګوند لخوا د عدلي قانون په مسودې باندې یې انتقادونه کړي وو.
د ترکیې صدراعظم ويلي دي چې ترکیه پلان نه لري چې د درېیو میاشتو وروسته دې د بیړني حالت موده وغځوي. خو هغه زیاته کړه چې که ضرورت یې وي نو د ترکیه حکومت به دغه کار وکړي.