په سري لانکا کې له هغه وروسته د اعدام په سزا محکومو شاوخوا ۱۵۰ کسانو اعتراض پیل کړ چې د ولسمشر د ملي بخښنې په لړ کې په اعدام یو محکوم سیاستوال له زندان څخه ازاد کړل شو.
سیاستوال دومیندا سلوا شاوخوا لس کاله مخکې د انتخاباتو اړوندې یوې قضیې کې د خپل ګوند د یو سیال د وژلو په تور په اعدام محکوم شوی و خو د سري لانکا ولسسمشر ګوتابهایا راجاپاکسا وبخښه.
د ملګرو ملتونو د بشري حقونو څانګې او په سري لانکا کې د امریکا سفارت د ولسمشر دا پرېکړه غندلې ده.
اوس شاوخوا ۱۵۰ نور زندانیان چې د بېلا بېلو جرمونو له کبله د مرګ په سزا محکوم شوي، اعتراض پیل کړی دی.
له حکومت څخه د دوی غوښتنه دا ده چې د هغوی د مرګ سزا دې په عمر بند سزا بدل کړي.
د دغو زندانیانو یو ویاند وویل چې د زندان چارواکي په دې اړه د عدلیې له وزارت سره په خبرو بوخت دي، خو ډېر جزیات یې ورنکړل.
په سري لانکا کې د شاوخوا ۱۰زره زندانیانو لپاره په جوړ شوي زندان کې لږ تر لږه ۲۶زره کسان ساتل کیږي.
په دغه هېواد کې تېرکال د کرونا ویروس د محدودیتونو له کبله په یو زندان کې شخړه وشوه او ۱۱ کسان پکې ووژل شول او څه باندې ۱۰۰ نور زندانیان ژوبل شول. د زندان ساتونکو ډزې کړې وې.
له ۱۹۷۶ کال راپدېخوا د سري لانکا حکومت هېڅ یو زنداني اعدام کړی نه دی.
