د افغانستان د لوړو زدهکړو وزارت وايي، سږکال د کانکور په آزموینه کې له ښوونځیو څخه د فارغ شویو ګډونوالو شمیر ۱۹۷ زره او ۹۲۲ تنو ته رسیږي.
د افغانستان د لوړو زدهکړو وزیر نجیبالله خواجه عمري د پنجشنبې په ورځ په کابل کې د کانکور د آزموینې د لومړي پړاو د پیل په مراسمو کې خبریالانو ته وویل، چې په ۳۳ ولایتونو کې ۱۴۵زره او ۷۹۱ کسانو د کانکور لپاره نوملیکنه کړې او نږدې ۵۸زره نور کسان به د کابل له حوزې څخه په کانکور کې شامل شي.
ښاغلي خواجه عمري زیاته کړه، چې د کانکور د آزموینې په غه شمیر ګډونوالو کې څه باندې ۴۷زره نجونې شاملې دي.
د ښاغلي خواجه عمري پر وینا، د افغانستان دولتي پوهنتونونه، د کانکور په آزموینه کې د ټولو ګډونوالو له شمیرې، د ۶۲زرو کسانو د جذب ظرفیت لري.
هغه دغه راز وویل، نږدې ۵۱زره کسان به د نیمه عالي زدهکړو په دولتي موسسو کې او څه د پاڅه درې نیم زره نور به په دیني مدرسو کې جذب شي.
په افغانستان کې د روان کال د کانکور آزموینه د وري په نهمه له لوګر، پنجشیر، بادغیس او نیمروز ولایتونو څخه پیل شوه او تر اوسه د ۳۲ ولایتونو په ۳۶ تحصیلي حوزو کې دغه آزموینه ترسره شوې ده.
د افغانستان د لوړو زدهکړو وزیر وویل، ټاکل شوې چې د کابل په تحصیلي حوزه کې د کانکور آزموینه په څوو پړاونو کې واخیستل شي او زیاته یې کړه، چې په ننګرهار ولایت کې به هم تر راتلونکو درېو ورځو پورې د کانکور د آزموینې لپاره د شاوخوا ۱۵زره کسانو د بایومتریک پروسه پیل شي.
د لوړو زدهکړو وزارت د معلوماتو له مخې، سږکال په کانکور آزموینه کې د بریالیتوب شمیره ۱۵۵ ټاکل شوې ده او هغه کسان چې له دغې شمیرې څخه زیاتې نمرې واخلي، خو د رشتې په ټاکلو کې د تیروتنې له امله بېنتیجې پاتې شي، هغوی به د لوړو زدهکړو خصوصي پوهنتونونو او موسسو ته معرفي شي.
ټاکل شوې چې د روان کال د کانکور آزموینې نتایج د زمري میاشتې په لومړیو لسو ورځو کې اعلان شي.
په ۱۳۹۶ کال کې نږدې ۱۷۰زره کسانو په کانکور آزموینه کې ګډون کړی وو، چې له دې شمېرې ۱۴۷زره او ۵۳۰ ګډون کوونکو د بریالیتوب نمرې ترلاسه کړې وې.