د کابل ولایت د قره باغو په ولسوالۍ کې د ناټو ځواکونو د موټرو په کاروان په ځانمرګي برید کې د ناټو یو عسکر وژل شوی او شپږ نور ژوبل شویدي.
پدې برید کې شپږ افغان ملکیان وژل شوي او د ناټو یو افغان ژباړونکی ټپي شویدی. د ناټو په اعلامیې کې راغلي دي چې د ناټو ځواکونو د ملي اردو د ځواکونو سره ګډه ګزمه کوله چې ځانمرګی برید پرې وشو.
یوه امریکایي چارواکي د نوم نه ښودلو په شرط د رویټرز خبري اژانس ته ویلي دي چې وژل شوی عسکر امریکایي ندی خو نور جزیات یې ندي ورکړي.
د ناټو ځواکونو په اعلامیې کې هم یوازې همدومره ویل شوي چې ټپي شوي عسکر د بګرام هوایي ډګر ته د تدواۍ لپاره وړل شوي.په اعلامیې کې دا ندي ویل شوي چې وژل شوي او ژوبل شوي عسکر د کوم هیواد دي.
د قره باغ ولسوال سمیع الله شریفي امریکا غږ ته ویلي دي چې ځانمرګی برید د ولسوالۍ ودانۍ سره نږدې شوی. ښاغلي شریفي همدرانګه وویل چې ځانمرګی برید کوونکی پلی روان و او د میرمنو جامې یې اغوستې وې.
دا په روانې اوونۍ کې په ناټو او امریکایي ځواکونو دویم ځانمرګی برید دی چې کیږي. دوه امریکایي ځواکونه د همدې تیرې چارشنبې په ورځ د کندهار په ولایت کې په ځانمرګي برید کې ووژل شول.
