په اندونیزیا کې پولیس وایي لږ تر لږه ۱۷۴ تنه وروسته تر هغه په ټیل ماټیل کې ووژل شول چې د فوټبال د یوې لوبډلې مینه وال په لوبغالي کې دننه د میدان په لور ورغلل او پولیسو یې د خواره واره کولو لپاره اوښکي بهونکی ګاز وکاراوه.
پولیس وایي پیښه شنبه اکټوبر ۱ (تلې ۹) د کانجوروهان په لوبغالي کې د دې هیواد په ختیځ کې د مالانګ په ښار کې رامنځته شوې ده.
لوبه د اریما او پیرسیبایا سورابایا د فوټبال د لوبډلو تر منځ وه چې د یو بل تر ټولو سیالې لوبډلې دي.
د اریما د لوبډلې مینه والو وروسته تر هغه د لوبې د میدان په لور هجوم یوړ چې دې لوبډلې لوبه پخپل کور ستدیوم کې سیالې لوبډلې ته دوه د درې په مقابل کې وبایلله.
دا په څه باندې شلو کالونو کې لومړی ځل و چې د اریما لوبډلې په پیرسیبایا سورابایا یوه لوبه وبایلله.
پولیسو د خلکو دا کړنه "بلوا" بللې او وروسته تر هغه یې اوښکې بهونکی ګاز وکاراوه چې دوه پولیس افسران ووژل شول.
د لوبغالي په میدان کې ډیری وژل شوي کسان د خلکو د پښو لاندې شوي.
د ختیځې جاوا د پولیسو مشر نیکو افینتا یکشنبه اکټوبر ۲ (تلې۱۰) په اعلامیې کې ویلي وو چې په ۱۲۷ کسانو چې وژل شوي دوه یې د پولیسو افسران و. د پولیسو دې چارواکي وویل چې ۳۴ کسان په لوبغالي کې دننه او پاتې یې په روغتون کې مړه شوي.
هغه زیاته کړه، " ټول د لوبغالي څخه د وتلو یوې دروازې خوا ته ولاړل او ګڼه ګوڼه ډیره شوه. په همدې بهیر کې د اکسیجن د کمښت له کبله د هغوي سا بنده شوه."
خو د ختیځ جاوا د والي مرستیال امیل ډارډک ددې هیواد کمپاز تلویزیون ته ویلي چې په پیښه کې لږ تر لږه ۱۷۴ کسان وژل شوي دي.
د اندونیزیا حکومت د پیښې په خاطر بخښنه غوښتې او د ټیل ماټیل په هکله یې د بشپړو پلټنو ژمنه کړې.
د حکومت د ورزش او ځوانانو د چارو وزیر ضیاالدین امالي په پیښې د خفګان د څرګندولو تر څنګ ویلي چې د لوبې د تنظیم او د تماشه چیانو او پلویانو په هکله به بشپړ تحقیقات کیږي.
د فوټبال د نړیوال فدراسیون رئیس ګیاني انفانتینو دغه ټیل ماټیل «له ادراک بهر غمیزه» بللې او د اسیا د فوټبال فدراسیون مشرتابه د خلکو په مړینه ژور خپګان ښودلی دی.
دا پداسې حال کې دي چې ټاکل شوې اندونیزیا د راتلونکې کال د مۍ په میاشت کې د شلو کالو لالندې ځوانانو د فوټبال د نړیوال جام د سیالیو کوربتوب وکړي.
د اندونیزیا ددې غمیزې څځه پخوا په نورو ستدیومونو کې هم ورته پیښې شوي دي چې یوه يې په ۱۹۸۹ کې د بریتانیا په هیلزبوروغ ستدیوم کې چې د لیورپول ټیم ۹۷ مینه وال په کې ووژل شول او بله یې په ۲۰۱۲ کې په مصر کې د سعید په ستدیوم کې وه چې ۷۴ تنه په کې په شخړو کې ووژل شول.
په ۱۹۶۴ کې د پیرو په لیما ملي ستدیوم کې د پیرو او ارجنتاین د لوبې په ترڅ کې ۳۲۰ تنه په ټیل ماټیل کې ووژل شول او له ۱۰۰۰ زیات ټپیان شول.