پاریس سینټ ژرمن، چې له څه مودې راهیسې له دې کلب څخه د کیلیان امباپی او نیمار د وتلو سره مخ و، بالاخره بریالی شو چې امباپي یو ځل بیا په خپله لوبډله کې وساتي.
پاریس سینټ ژرمن د فرانسې د غوره لیګ په نوي فصل کې پداسې حال کې له جنجالونو سره مخ دی چې ویل کیږي د برازیل د ملي لوبډلې بریدګر لوبغاړی، نیمار د سعودي عربستان د لیګ سره د یوځای کیدو په خبرو اترو بوخت دی.
د لوریان ټیم سره د پاریس سینټ ژرمن پرونۍ سیالي پرته له کوم ګول، مساوي پای ته ورسیده، هغه نتیجه چې د دې ټیم نوي روزونکي لویس اینریک ته یې کومه بریا په برخه نکړه.
امباپی، چې د څو اونیو راهیسې د خپل تړون پر سر د اختلاف له امله په سیالیو کې ګډون نه و کړی او حتی د لومړي ټیم سره یې په تمریناتو کې د ګډون اجازه هم نه درلوده، بالاخره، لږترلږه د اوس لپاره په سیالیو کې شامل شو او خپل تمرین یې پیل کړل.
پاریس سینټ ژرمن د یوې اعلامیې په خپرولو سره امباپی سره مذاکرات "اغیزمن او مثبت" بللي دي.
دا په داسې حال کې ده چې نیمار په پرونۍ سیالۍ کې حضور نه درلود او د پاریس سېنټ ژرمن چارواکو ویلي چې د نشتون وجه یې د هغه ناروغي ده.
خو یوې سرچینې فرانس پرس اژانس ته ویلي، چې د پاریس سېنټ ژرمن برازیلي بریدګر لوبغاړی د دغه کلب د مدیر او یا هم د دغه کلب په پلانونو کې شامل نه دی او ښايي دا کلب پرېږدي.
نیمار د ۲۲۰ میلیون یورو په ارزښت د تړون په لاس لیک کولو سره په ۲۰۱۷ کې له بارسلونا څخه د پاریس سینټ ژرمن سره یوځای شو.
د فرانسې د سپورت ورځپاڼې لی ایکویپ راپور ورکړی چې د الهلال کلب نیمار ته وړاندیز کړی دی.
تیره میاشت د الهلال کلب امباپی ته د ۳۰۰ یملیون یورو قرارداد وړاندیز وکړ، خو د راپورونو له مخې، هغه ددغه کلب له چارواکو سره له لیدو ډډه وکړه.
که نیمار سعودي عربستان ته لاړ شي، هغه به د هغو لوبغاړو په لیست کې شامل شي چې د تیلو ددغه بډایه هیواد څخه یې وړاندیزونه ترلاسه کړي دي.
کریستیانو رونالډو د جنوري په میاشت کې د النصر کلب سره یوځای شو.
د پاریس سینټ ژرمن کلب رئیس ناصر بن غانم الخلیفي تیره میاشت وویل: "زموږ دریځ خورا روښانه دی. که کیلیان غواړي چې پاتې شي، نو باید نوی تړون لاسلیک کړي. موږ نشو کولی چې د نړۍ غوره لوبغاړی نن په وړیا توګه ټیم پریږدي."
امباپی په پاریس سینټ ژرمن کې پاته شو، خو نیمار ښایي عربستان ته لاړ شي
فورم \ دبحث خونه