په کینیا کې یو مذهبي مشر چې خپلو پیروانو ته یې ویلي وو له لوږې په ځان وژنه کې ثواب دی، له ۱۰۰ زیاتو کسانو د مړینې په تړاو د جمعې په ورځ مۍ پنځمه (غوايي ۱۵) محکمې ته حاضر کړل شو.
پر پاول مکینزي نیتینګ باندې له دې کبله د ترهګرۍ تور لګېدلی چې له خپلو پیروانو یې غوښتي چې خدای ته د رسېدو دپاره ځانونه له لوږې ووژني.
د کینیا پولیسو تېره میاشت وویل چې په ډله ایزو قبرونو کې یې د ۱۰۹ کسانو جسدونه وروسته له هغه وموندل چې ددغې قضیې په اړه ورته خبر ورکړل شو.
پولیس وايي ددغه خبر له تر لاسه کولو وروسته یې د مالنډي ساحلي ښارګوټي ته نږدې د شاکاهولا په ځنګله کې لټون پیل کړ او وېره ښودل شوې چې د قربانیانو شمېر به له دې ډېر زیات وي.
فرانس پرس خبر ورکړی چې له ډله ایزو قبرونو څخه په موندل شویو جسدونو کې ماشومان هم شامل دي چې د څارنوالۍ د راپور په اساس، ځینې یې د وهلو ټکولو او زندۍ کولو په نتیجه کې مړه شوي دي.
راپور وايي، نیتینګ پخوا ټکسي چلوله او وروسته یې پر ځان د مذهبي مشر نوم کېښود.
پولیسو وړاندې ویلي چې د نوموړي په مشرۍ د "ګوډ نیوز نړیوالې کلیسا" ځینې پیروان په لوږه کې ممکن د شاکاهولا ځنګله په ونو او بوټو کې پټ وي او که ژر تر ژره ونه موندل شي د مرګ له خطر سره مخامخ دي.
په دې تړاو د ایزکیل اوډیرو په نوم د کینیا یو بل مشهور مذهبي مشر هم تېره اونۍ ونیول شو.
ددې خبر له خپرېدو وروسته د کینیا ولسمشر ویلیم روټو د "نه منلو وړ" داسې مذهبي خوځښتونو او دودونو د مخنیوي ژمنه کړې چې د نوموړي په خبره د جرمونو سبب کیږي.
