په کینیا کې یو لوړ پوړی مذهبي مشر خپلو پیروانو ته د ثواب دپاره له لوږې د ځان وژنې د امر کولو په تړاو نیول شوی دی.
د "نوي ژوند دعا" کلیسا مشر ایزکیل اوډیرو، د پنجشنبې په ورځ اپریل ۲۷ (غوايي اوومه) د مالینډي په ساحلي ښارګوټي کې ونیول شو چیرې چې پولیسو تر اوسه د ۱۰۹ داسې کسانو مړي موندلي چې له لوږې مړه شوي دي.
د مالینډي سیمې په یوه ځنګله کې په موندل شویو جسدونو کې ماشومان هم شامل دي.
پر نیول شوي مذهبي مشر ایزکیل اوډیرو باندې د وژنو، له ځان وژنې سره د مرستې، اختطاف، افراطیت، د بشریت ضد جرمونو، پر ماشومانو د ظلم او درغلۍ تور لګول شوی دی.
په عین وخت کې، د کینیا څارنوالان وايي ددغه هېواد د یو بل مذهبي مشر په اړه هم پلټنې کوي چې خپلو پیروانو ته یې ویلي خدای ته د رسېدو دپاره له لوږې ځانونه ووژني.
داسې انګیرل کیږي چې د مذهبي مشر پاول مکینزي نیتینګ په مشرۍ د "ګوډ نیوز نړیوالې کلیسا" ځینې پیروان په لوږه کې ممکن د شاکاهولا ځنګله په ونو او بوټو کې پټ وي او که ژر تر ژره ونه موندل شي د مرګ له خطر سره مخامخ دي.
ددې خبر له خپرېدو وروسته د کینیا ولسمشر ویلیم روټو د "نه منلو وړ" مذهبي خوځښتونو د مخنیوي ژمنه وکړه.
د کینیا د کورنیو چارو وزیر، کیتوري کینډیکي، خبرداری ورکړ چې د داسې مذهبي مشرانو په وړاندې به اقدام کوي چې مذهب د "عجیبو او نه منلو وړ ایډیالوژیو د پرمخ وړلو لپاره کاروي."
د کینیا د کورنیو چارو وزیر دا ډول مذهبي مشران له ترهګرو سره پرتله کړل.
