په کندهار کې چې پخوا په زیاته کچه کوکنار کرل کېدل، اوس په کې د نورو بدیلونو تر څنګ د پستې باغونه هم زیات شوي دي.
هغه کروندګر چې اوس یې د پستې باغونه جوړ کړي وايي، دغه باغونه ځکه په کندهار کې ښې پایلې ورکوي چې لږو اوبو ته اړتیا لري او ګټه یې هم تر نشه يي توکو زیاته ده.
د دې ولایت په دامان ولسوالۍ کې د پستې تازه کرل شوي نیالګي چې وروسته د پستې د باغونو د لپاره کار ورڅخه اخیستل کیږي.
د پستې د باغونو جوړېدو ته تر ډېره په هغو سیمو کې لیوالتیا شته چي د اوبو منابع يې لږ دي.
د پستې د نیالخانې یا نرسری پالونکی عصمت الله وايي چي د پستې له حاصلاتو سره ځمکه وال بلد شوي او اوس هڅه کوي چي په خپلو ځمکو کې يې باغونه جوړ کړي.
هغه وايي " د پستې ښه والی دا دی چې کمې اوبه غواړي، اوس په کندهار کې ډېر خلک ورسره بلد شوي دي او غواړي چې په خپلو ځمکو کې د پستې باغونه جوړ کړي".
د کندهار ولایت د میوند ولسوالي هغه سیمه ده چې د تریاکو پراخ کښتونه په کې کېدل خو اوس يې ځمکه والو د پستو باغونو ته مخه کړې.
په کندهار کې ځمکه وال او باغ لرونکي څو کاله وړاندې د پستې له کرلو سره اشنا شول، خو په لږ وخت کې د پستو باغونه د دې ولایت تر ډېرو سیمو ورسېدل.
