د ننګرهار سیمه ییز چارواکي وايي، د داعش ډلې د مشر عمر خراساني یو مهم ساتونکی عبدالواجد یې نیولی دی.
د ننګرهار د والي ویاند عطاءالله خوګیاڼي نن پنجشنبه امریکا غږ ته وویل، چې نوموړی تېره شپه په بهسودو ولسوالۍ کې د ملي امنیت ځواکونو لخوا نیول شوی دی.
هغه وویل، نیول شوی کس چې د داعش ډلې د وژل شوي مشر عمر خراساني له مهمو ساتونکو څخه و، د ځینو هدفي وژنو په لپاره بهسودو ولسوالۍ ته راغلی و.
ښاغلي خوګیاڼي وویل، چې نیول شوی کس د داعش ډلې په لیکو کې پراخ نفوذ لري.
پر همدې مهال نیول شوی کس چې ځان د داعش په لیکو کې د زهیر په نوم سره معرفي کوي وايي، له څه باندې ۲۰ میاشتو راپدېخوا په اچین ولسوالۍ کې د داعش ډلې سره یو ځای شوی او تر هغه وروسته په کونړ کې د دغه ډلې له قوماندان عمر خراساني سره یو ځای شو.
پر همدې مهال امنیتي چارواکي په دغه ولایت کې د شیرین په نوم د وسله والو طالبانو د یو مهم قوماندان د نیول کېدو خبر هم ورکوي.
د ننګرهار د امنیه قوماندانۍ ویاند فرید خان امریکا غږ ته وویل، یاد قوماندان چې تېره شپه نیول شوی د سرخ رودو ولسوالۍ پر ودانۍ په انتحاري حملو کې لاس درولود.
هغه وايي، نیول شوي کس پر سرخرود ولسوالۍ د انتحاري حملې پلان درلود چې هدف ته ترسېدو مخکې ونیول شو.
داعش او طالبانو تر دا مهاله په دې اړه څه نه دي ویلي.
