د ایران د عدلیې وزارت نن دوشنبه مۍ ۱۵ (غوايي۲۵) اعلان وکړ چې پنځه کسان یې د مخدره موادو وسله وال قاچاق په تور اعدام کړي دي.
د ایران د عدلیې وزارت ویبسایټ [میزان] ویلي دي چې دا کسان «مجرمان او د مخدره موادو د وسله وال قاچاق کوونکي» وو چې د ایران د عالي محکمې په حکم اعدام کړل شول.
د میزان ویبسایټ د ایران د جنوبي ولایت «هورمزګان» د محکمې د مشر مجتبی غرماني له خولې لیکلي دي چې په دغو کسانو باندې«د اعدام حکم په سهار کې د بندر عباس او میناب په زندانونو کې تطبیق» شوی دی.
په دې سره په ایران کې په څه کم یوې اوونۍ کې د اعدام شویو کسانو شمېر اتو ته ورسېده.د چهارشنبې په ورځ ایران درې نور کسان هم د قاچاقو په تور اعدام کړل.
په همدې حال کې ملګرو ملتونو خبرداری ورکړی دی چې په ایران کې د اعدام کېدونکو کسانو شمېر ورځ په ورځ زیاتېږي. د بخښنې نړیوال سازمان وايي چې ایران په نړۍ کې تر چین وروسته دویم هېواد دی چې په یو کال کې یې ډېر کسان اعدام کړي دي.
ایران همدغه راز د دوشنبې په ورځ دوه کسان اسلامي مقدساتو ته د سپکاوي په تور اعدام کړل. متحدو ایالتونو او د بشر حقونو سازمانونو د ایران دا کار غندلی دی.
د ملګرو ملتونو د بشر حقونو د څانګې مشر ولکر ترک په ایران کې د اعدامونو د مخ په زیاتېدونکې لړۍ په اړه خبرداری ورکړی او ویلي دي چې ایران هره اوونۍ په اوسط ډول څه باندې ۱۰ کسان اعداموي.
د روان میلادي کال له پیل راهېسې په ایران کې ۲۱۰ تنه اعدام شوي چې اکثریت یې د نشه يي توکو د قاچاقو په تور محکوم شوي وو، خو ملګري ملتونه وايي ممکن د اعدام شویو کسانو شمېر تر دې زیات وي.
د بشري حقونو سازمانونه وايي چې ایران تېرکال ۵۲۸ کسان اعدام کړي دي، وړم کال یې ۳۳۳ کسان اعدام کړي وو.
