په ایران کې یوې محکمې دوه کسان د وسله والې غلا په تور په اعدام محکوم کړي دي. د تهران محکمې دا کسان "له خدای سره په دښمنۍ" پړه ګڼلي دي.
د ایران د عدلیې وزارت اړوند د میزان انلاین خپرونې د چهارشنبې په ورځ جولای ۱۰ (چنګاښ ۲۰) خبر ورکړ چې د اپریل اتمې د تهران پر عمومي سرک د غلا په قضیه کې یو بل تن په ۲۵ کلونو زندان محکوم شوی دی.
میزان لیکلي: "د تهران انقلابي محکمې ۲۸مې څانګې دوه کسان د وسله والو شوکو، ناامنۍ ایجادولو او خدای سره دښمنۍ په جرم په اعدام محکوم کړل."
درې واړه کسان د ایران په ستره محکمه کې د استیناف غوښتلو حق لري.
د بخښنې نړیوال سازمان او د بشري حقونو نورې نړیوالې ادارې وايي، ایران له چین وروسته په نړۍ کې ترټولو زیات خلک اعداموي.
په ناروې کې میشتې د ایران د بشري حقونو ادارې د معلوماتو له مخې، په ایران کې د ۲۰۲۴ په لومړیو شپږو میاشتو کې لږ تر لږه ۲۴۹ کسان اعدام شوي چې ۱۰ یې ښځې دي.
فورم \ دبحث خونه