حماس شپږ نور اسرائیلي یرغمل خوشې کړل

د حماس ډلې د شنبې په ورځ فبروري ۲۲ (کب څلورم) شپږ نور اسرائیلي یرغمل خوشې کړل او تمه ده چې د اسرائيل لوری هم فلسطیني بندیان خوشې کړي.

دا د نازک اوربند د لومړي پړاو په ترڅ کې د ژوندیو یرغمل شویو اسرائیلیانو له ډلې وروستي کسان و چې نن د حماس ډلې له خوا خوشې شول.

د فرانس پرس اژانس راپور ورکړی چې حماس دا شمېر اسرائیلي یرغمل له څه باندې ۱۶ میاشتو بند وروسته د غزې په نصیرات او رفح سیمو کې د ځانګړو مراسمو په ترڅ کې خوشې او سره صلیب ته سپارلي دي.

د اسرائيل پوځ تائید کړې ده چې خوشې شوي کسان په اسرائيل کې خپلو کورونو ته ستانه شوي دي.

د فلسطیني بندیانو د ملاتړ ډلې ویلي اسرائیل به د تبادلې د یوې برخې په توګه نن ۶۰۲ فلسطیني بندیان خوشې کړي چې زیات شمېر یې د غزې اوسیدونکي دي او د جګړې پرمهال نیول شوي دي.

د اسرائيل او حماس ترمنځ د نازک اوربند د لومړي پړاو له پیل راهیسې تر اوسه ۲۴ ژوندي اسرائیلي یرغمل او له ۱۱۰۰ څخه زیات فلسطیني بندیان خوشې شوي دي.

حماس همداشان د پنجشنبې په ورځ د پنځو یرغملو جسدونه د اسرائیل لوري ته وسپارل چې د دې ډلې په وینا پر غزه باندې د اسرائيل په بریدونو کې وژل شوي و.

د اسرائیل او حماس ترمنځ د شپږو اونیو اوربند دوه اونۍ پاتې دي او دواړو خواو تراوسه ددې اوربند د غځولو په اړه موافقه نه ده کړې.

د حماس ډلې د ۲۰۲۳ عیسوي کال د اکتوبر په اوومه پر اسرائیل برید وکړ، چې د اسرائیلي چارواکو په وینا په دغه برید کې ۱۲۰۰ کسان ووژل شول او ۲۵۰ نور یرغمل شول. چارواکي وايي، په لسګونو یرغمل اوس هم په غزه کې پاتې دي.

اسرائيل د حماس د برید په ځواب کې پر غزې باندې هوايي او ځمکني بریدونه پیل کړل چې غزې د روغتیا وزارت د معلوماتو له مخې د غچ اخیستنې په دغو بریدونو کې له ۴۷۰۰۰ څخه زیات کسان چې ډېر ملکي وګړي و وژل شوي او د دې ښار له ۷۰ سلنې څخه زیاتې ودانۍ ویجاړې شوي دي.