د حماس پوځي څانګې د جمعې په ورځ فبرورۍ ۲۱ (کب ۳) تائید کړه چې د لنډمهاله اوربند د موافقې پر اساس به د شنبې په ورځ شپږ اسرائیلي یرغمل شوي کسان له بنده خوشې کړي.
د حماس پوځي څانګې عزالدین القسام د جمعې په ورځ د یوې اعلامیې په خپرولو سره ویلي چې د یرغمل شویو کسانو د خلاصون بهیر به له پلان سره سم پرمخ ولاړ شي.
په ورته وخت کې، د اسرائیل د یرغمل شویو او بې درکه شویو کورنیو ټولنې د دې اونۍ په پیل کې د شپږو یرغمل شویو نومونه خپاره کړل، چې په کې الیا کوهن، تل شوهام، عمر شم توف، عمر وینکرټ، هشام السید او اورا منګیستو شامل دي.
د شپږو یرغمل شویو اسرائیلي بندیانو د خلاصون اعلان یوه ورځ وروسته له هغه وشو چې حماس د پنجشنبې په ورځ د څلورو اسرائیلي یرغمل شویو جسدونه اسرائیل ته وسپارل، چې په کې د بیباس د کورنۍ درې غړي او یو بوډا سړی شامل وو، چې د دې ډلې په وینا د جګړې په پیل کې د اسرائیل په هوايي برید کې وژل شوي وو.
دا لومړی ځل دی چې حماس د یرغمل کسانو جسدونه سپاري. حماس ادعا کړې چې دا کسان د هغوی د ساتونکو سره یو ځای د اسرائیل په هوايي بمباریو کې وژل شوي دي.
د حماس اورپکو دغه جسدونه سره صلیب ته سپارلي او وروسته له غزې څخه اسرائیل ته لیږدول شوي، چیرې چې په لسګونو کسانو ورته انتظار کاوه.
د اسرائیل او حماس ترمنځ د شپږو اونیو اوربند دوه اونۍ پاتې دي او دواړه خواوې تراوسه ددې اوربند د غځولو په اړه موافقې ته ندي رسېدلي.
د حماس اورپکو د ۲۰۲۳ د اکتوبر په اوومه په اسرائیل کې په یو برید کې، د اسرائیلي مقاماتو په خبره، ۱۲۰۰ کسان ووژل او ۲۵۰ نور یې یرغمل کړي. چارواکي وايي، په لسګونو یرغمل اوس هم په غزه کې پاتې دي.
په ځواب کې، د حماس خلاف په غزه باندې د اسرائیل په هوايي او ځمکنیو بریدونو کې، د غزې د روغتیا وزارت د معلوماتو له مخې، له ۴۷۰۰۰ څخه زیات کسان وژل وشي او له ۷۰ سلنه زیاتې ودانۍ ویجاړې شوي دي.
فورم \ دبحث خونه