په نشه يي توکو دا معتاد هر سهار د ګردېز بالاحصار دې سمڅو ته راځي او له نورو روږدو سره يو ځای نشه يي مواد څکوي. څه باندې دېرش کاله کيږي چې اعتياد ته يې مخه کړې ده.
عبدالله اشنا تلويزيون ته وويل، چې نشه يي توکي په څرګندو ځايونو کې خرڅيږي او په اسانۍ سره د هر معتاد د لاسرسي وړ دي.
عبدالله وويل: ”له کابل نه يې يو عملي راوړي او بيا يې دلته پر موږ خرڅوي. بيا لاړ شي بيا يې راوړي. په کومو ځايونو کې چې خرڅيږي هغه ټول ځايونه حکومت ته معلوم دي.‟
په مخدره موادو دغه روږدي وايي، که حکومت د نشه يي موادو د خرڅلاو مرکزونه له منځه يوسي، نه يواځې دوی به ترې لاس واخلي، بلکې نورو ځوانانو ته هم د اعتياد زمينه نه مساعديږي.
یو بل روږدی لايق وايي: ”همدغه ګردېز کې خرڅيږي. ساقيان يې راوړي او همدلته يې خرڅوي. ټول حکومت ته معلوم دي چې پلانی او پلانی يې خرڅوي. موږ ته راشي په موږ هسې ظلم کوي‟.
په ورته وخت کې د پکتيا د امنيې قوماندانۍ د امنيت آمر سمونوال دادالله هوتک دا نه مني چې ګني نشه يي توکي په دوکانونو کې خرڅيږي. هغه وويل پوليس ددغو موادو پرضد قاطع مبارزه پرمخ وړي.
د پکتيا امنيه قوماندانۍ د امنيت آمر زياتوي: ”موږ دا ادعا نه منو او که چېرې چا ته معلوم وي، زموږ پوليس همېشه د خلکو په خدمت کې دي، موږ ته دې وښيي، پوليس به اجراات پرې وکړي او کسان به ونيسي.‟
پکتيا کې د کوکنارو کر نشته خو په ځينو ولسواليو کې يې د چرسو کرکيله عامه ده. د خلکو اندېښنه دا ده چې نشه يي موادو ته د لاسرسي له کبله د روږدو کسانو شمېر مخ پر ډېرېدو دی.
