له تېرې یوې اونۍ راپه دېخوا ټولو هغو کاندیدانو چې په پارلماني انتخاباتو کې یې د کامیابۍ رایې نه دي اخیستي، د انتخاباتو د شکایتونو کمېسیون دفتر مخکې ته خېمه وهلې وه، خو نن له لسګونو خلکو سره یو ځای دغه کاندیدانو مظاهره وکړه.
مظاهره چیان غواړي چې د کندز رایې دې له سره وشمېرل شي، او ټولې غیر قانوني استعمال شوې رایې دې باطلې اعلان شي.
اجمل شاه پور د پارلمان یو تن کاندید دی هغه وايي چې که د دویم ځل لپاره رایې ونه شمېرل شي، دوی به مظاهرو ته دوام ورکوي او بلاخره به مدني سرغړونې پیل کړي.
هغه وايي:"دوی د پارلماني انتخاباتو په ورځو کې په لسګونو زره ډالر مصرف کړي، د ټاکنو په ورځ خلک وژل شوي، نو که وکیلان انتصابي انتخابېدل ولې یې پر مونږ پیسې مصرف کړې."
د پارلماني انتخاباتو یو بل کاندید عبدالغفور هوتک بیا وايي چې که د دوی غوښتنې ونه منل شوې، نو د جمهوري ریاست د انتخاباتو په ورځ به د جمهور رئیس اشرف غني او ډاکټر عبدالله د کمپاین دفترونو ته اور واچوي او په دغه ولایت کې به د ریاست جمهورۍ انتخابات پرینږدي چې خلک په کې ګډون وکړي.
هغه وايي چې دوي به سبا د کندوز ټولې لوېې لارې وتړي.
د افغانستان د ولسي جرګې ټاکنې د روان کال په میزان میاشت کې تر سره شوې چې تر دامهاله یې د ټولې لومړنۍ پایلې نه دي اعلان کړي.
