د افغانستان د کورنیو چارو وزارت د غزني د برید په اړه د خپلو تحقیقاتو لومړنۍ پایلې اعلان کړې.
د وزارت ویاند نجیب دانش د پنجشنبې په ورځ (اګست۳۰) امریکا غږ ته په څرګندو کې ټکو کې وویل چې د هغوی لومړني تحقیقات ښيي چې "د پاکستان د پوځ افسرانو د غزني د جنګ مشري په غاړه لرله."
ښاغلی دانش وايي لا هم د اګست د لسم تاریخ د برید پر څرنګوالي تحقیقات روان دي او د تحقیقاتو نهايي نتایج به بیا د پاکستان له حکومت سره هم شریکوي.
هغه وویل د غزني برید په پاکستان کې پلان شوی و او په خبره یې له جنګ وروسته د غزني پر سړکونو د لسګونو پاکستانیانو مړي پاتې شوي وو.
پاکستان د افغانستان دا تورونه در کړي دي. د پاکستان د بهرنیو چارو وزارت ویاند محمد فیصل امریکا غږ ته وویل "دا هغه تورونه دي چې موږ سره یې هېڅ ثبوت نشته او دا د اړیکو د خرابولو لامل ګرځي. موږ غواړو چې مخکې ولاړ شو او مسایل حل کړو."
د غزني له برید وروسته په ټولنیزو رسنیو کې داسې ویډیوګانې او تصویرونه خپاره شول چې په کې ښودل کېدل چې په غزني کې د "وژل شویو اورپکو مړي پاکستان" ته انتقال شوي دي.
خو د پاکستان پوځ ویلي وو چې په غزني کې وژل شوي پاکستانیان ښايي هغه خلک وي چې افغانستان ته د کار لپاره تللي وو.
افغان چارواکي وایي د غزني په برید کې شاوخوا ۵۰۰ اورپکي وژل شوي دي. په دغه برید کې همدغه راز د لسګونو افغان سرتېرو او ولسي خلکو د وژل کېدو او ژوبل کېدو راپورونه هم ورکړل شوي دي.
