د افغانستان د عامې روغتیا وزارت په ۱۳۹۹ مالي کال کې دوه زره او ۴۹۱ ترافیکي پېښې چې په کې مسافرو ته مرګژوبله اوښتې لامل ثبت کړي دي.
د دغه وزارت د ویاند مرستیالې معصومې جعفري د دوشنبې په ورځ فبروري اتمه (سلواغې ۲۰) امریکا غږ ته وویل دا پېښې د ۱۳۹۹ مالي کال له پیل څخه تر پایه ثبت شوي چې په کې په مجموعي ډلو ۱۲زره او ۹۵۳ کسانو ته مرګژوبله اوښتې ده.
هغې زیاته کړه: "۱۲زره او ۷۵۰ کسه ټپیان شوي او ۱۷۷ کسانو خپل ژوند له لاسه ورکړی دی".
د روغتیا وزارت د معلومات ښيي چې په مړو شویو کسانو کې ۲۵ او په ټپیانو کې ۱۹۰۳ ښځې شاملې دي.
د روغتیا وزارت د معلوماتي بانک د شمېرو په اساس د افغانستان په پنځو ولایتونو کندز، پروان، هلمند، ننګرهار او هرات کې تر ټولو زیاتې ترافیکې پېښې ثبت شوې دي.
که څه هم د څلورو نورو ولایتونو په پرتله په هرات ولایت کې لږې ترافیکي پېښې ثبت شوي خو په دغو پېښو کې زیات شمېر مسافرو ته مرګژوبله اوښتې.
د روغتیا وزارت د معلوماتو په اساس په دغه ولایت کې ۴۷تنه د ترافیکو پېښو له کبله مړه شوي او ۶۳۴ نور ټپیان شوي دي.
له هرات وروسته هلمند او ننګرهار ولایتونو کې د ترافیکي پېښو له امله خلکو ته زیاته مرګژوبله اوښتې ده.
د افغانستان د ترافیکو عمومي رئیس جنرال سید نورالله مراد امریکا غږ ته وویل چې تر ټولو زیاتې پېښې د کابل – جنوب او کابل – شمال پر لویو لارو شوي دي.
جنرال مراد د ترافیکو مقرراتو نه رعایتول، د سرکونو خرابوالی، په زیات سرعت سره د موټرو چلول او د ډریورۍ پر مهال د نشهيي توکو کارول د ترافیکي پېښو عمده لاملونه یاد کړل.
هغه ټینګار وکړ که د موټرو چلوونکي ترافیکي اصول او ورته ښودل شوې لارښوونې رعایت کړي نو په افغانستان کې به د ترافیکو پېښو او له امله یې د اوښتې مرګژوبلې په کچه کې کموالی راشي.
